USA ka langyaw nipasangil sa igsuon ni Cebu City Mayor Michael Rama nga niyabo og kape ug nisuntok sa iyang nawong sa makadaghan nga higayon sulod sa McDonald sa Barangay San Nicolas, dakbayan sa Sugbo.

Si Henri Marcel Angers, 76,lumad sa Boston, Massachusetts, kan­hi pulis ug sundawo sa Amerika, nipasangil kang Fernando Lopez Rama, 78, taga Basak San Nicolas, nga maoy niataki kaniya sulod sa McDonald sa maong barangay.

Base sa medico-legal gikan sa Cebu City Medical Center, si Angers nakaangkon og superficial taphaw nga paso ug gamay nga gasgas sa ilong ug dapit sa mata sa paghiling ni Dr. Ma. Dulce Consuegra niadtong Hunyo 14 ning tuiga.

Sa affidavit sa langyaw nga gisumiter ngadto sa Prosecutor's Office niadtong Hunyo 20, nagbutyag nga niadtong Hunyo 14, alas 7 sa buntag, nisulod siya sa McDonald aron mamahaw.

Siya nidiretso sa cashier alang sa iyang order ug human sa iyang pagbayad, nilingkod siya ug paglabay sa pipila ka minutos, nisulod si Ferndando.

Iyang nabantayan nga inay moadto sa cashier aron mopalit, nideretso kini og lingkod ug nitawag ni Jeffry Saplad, security guard, aron papaliton sa order.

Human sa pagpalit ni Saplad og kape, gitawag ni Angers ang gwardiya ug iyang giingnan nga dili to niya angay buhaton.

Giingong nakit-an siya sa maguwang sa mayor nga nakighinabi ni Saplad ug gitawag ni Rama ang guard nga nangutana og unsay.

Sa dihang gisultihan sa gwardiya bahin sa gi­istorya ni Angers, kalit nga nibarog si Rama dayon nigawas sa establisemento ug nitawag og traffic enforcer.

Ang enforcer nisulod sa McDonald apan igo ra nga nitan-aw kaniya ug walay gibuhat nga giingong gikasuko sa maguwang sa mayor.

Nipasangil si Angers nga nikuha kini sa kape ug dayongyabo sa iyang nawong dayon nisuntok kaniya.

Ang security guard ni­uwang kanila dayong dala kanilang duha ngadto sa Police Station 11 ug nagpa-blotter sa usag-usa dayon dala ngadto sa Cebu City Medical Center aron pagpakonsulta.

Ang mayor gidayeg ni Angers gumikan sa pagkamaayo ani nga tawo ug iyang nahimamat pipila na ka higayon.

Ang Sun.Star Superbalita nisuway og tawag sa mayor aron kuhaan sa ilang habig apan way nitubag sa iyang cellphone. (PAC)