GITUMBOK nga utok sa pagpatay sa magpapatigayon sa Sugbo nga si Richard King ang girelibohan na sa puwesto isip pangu sa Regional Intelligence Unit sa Davao Region kagahapon.
Si RIU Director Supt. Leonardo A. Felonia girelibohan subay sa kamandoan ni Philippine National Police Intelligence Group Director Diosdado Ramos. Siya ang gihulipan sa kanhi deputy director nga si Chief Insp. Ryan Paloma.
Si Felonia, nisumitir sa iyang kaugalingon ngadto kang Davao City Mayor Rodrigo Duterte niadtong Lunes sa gabii ug giubanan sa mayor ngadto sa buhatan sa National Bureau of Investigation sa siyudad.
Siya nadestino kanhi sa Mandaue City Police Office (MCPO) gikan sa 2009 ngadto sa 2010 isip deputy city director for operations ubos ni Sr. Supt. Orlando Ualat.
Si Sr. Supt. Paul Labra, hepe sa RID 7, niingon nga nakurat sila sa kalambigitan ni Felonia tungod kay maayo kini nga pulis.
Niangkon sa krimen
Si Felonia maoy gitumbok sa gunman nga si Paul Dave Colina Labang nga giingong maoy nagsugo niya sa pagpatay ni King bugti sa bayad nga P30,000. Si Labang niangkon sa gihimong krimen.
“Giangkon nako Sir nga akoy nagpusil,” kumpisal niini dihang nahinabi sa tigbalita sa GMA- Davao atubangan sa iyang mga kabanay.
Siya nibutyag nga gisultian siya ni Felonia nga usa ka drug lord si King hinungdan nga iya kini gipapatay.
“Mangayo ko og pasaylo,” mahinulsolon nga pamahayag ni Labang samtang naghilak ngadto sa pamilya sa biktima.
Ang mamumuno uban sa magsuong sila si Rommel dela Cerna, 39, usa ka police asset; ug Rodel dela Cerna, drayber sa motorsiklo, ang nasikop sa kapolisan sa Davao niadtong Dominggo.
Ang tulo giingong pulos mga kawani sa Laud Firing Range sa dakbayan sa Davao.
Mitahan
Si Felonia, niklaro nga wala siya mo-surrender kay di siya suspek sa krimen kondili niboluntaryo pagpresentar sa iyang kaugalingon aron paglimpiyo sa iyang pangan sa pasangil nga siya ang mastermind.
“That is why I am here. I am submitting myself to investigation,” pagtataw sa maong opisyal sa kapolisan.
Siya, mao usab ang supervisor sa Task Force Sanglahi-Alpha on Counter Terrorism sa Mindanao.
Si Felonia magpabilin nga gawasnon sanglit wala pay warrant of arrest nga gipagawas batok niya.
Si NBI Davao Director Dante Guirran sa interview sa Bombo Radyo kagahapon sa buntag, nipasalig nga mohimo og fact-finding investigation ang ilang buhatan sa kalambigitan ni Felonia sa pagpatay ni King.
“We will conduct our own investigation. Among subayon tanan gikan sa mga witnesses, cartographic sketch, hangtod sa mga suspects, tanan na kailangan. Ang among ikapasalig nga among buhaton among trabaho aron masulbad ang kini,” pasalig ni Guirran.
Siya nalipay sa boluntaryong pagsumitir ni Felonia sa imbestigasyon.
Mastermind
Si Rommel nikumpisal nga si Felonia maoy ni-contact ni Labang ug nimando nila kon anaa ba sud sa iyang buhatan si King.
Siya nidugang dihang ilang natino ang presensiya ni King sud sa Vital C building, si Labang nisulod dayon sa building ug nipusil sa biktima tumong sa ulo.
Si King patay dihadiha human sa pagpamusil niadtong Hunyo 12 sa Davao City. (Dugang taho gikan sa Sun.Star Davao)