GIPAKLARO sa Police Regional Office (PRO) sa Davao nga napasaka na ang kasong murder batok ni Police Superintendent Leonardo Felonia human gilambigit sa pagpatay sa negusyanteng si Richard Lim King niadtong Hunyo 12.
Kini ang gibutyag ni Police Chief Inspector Jed Clamor, spokesperson sa PRO-Davao, human nalakip si Felonia sa pagpasaka'g kasong murder uban sa tulo ka mga suspek, Martes sa gabii.
Sumala ni Clamor nga nahimong basihan sa pagpasaka og kaso kang Felonia ang pahayag nila Paul Dave Molina Labang, Rommel dela Cerna, 39, ug Rodel dela Cerna, 32, pulos nagpuyo sa Purok 51, Laud Compound, Diversion Road, Barangay Maa.
Tungod niini, gipatawag sa Special Investigating Task Group si Felonia aron mo-report sa task group sa national headquarters sa Camp Crame aron didto siya i-kustodiya.
"Wala tay legal grounds for his arrest gumikan regular filing ang nahitabo sa pagpasaka og kaso sa iyaha," sulti ni Clamor sa pakighinabi sa mga tigbalita.
"Ongoing pa man ang kaso," dugang sa opisyal.
Gihulga
Nagpatabang ang kabanay ni Molina ngadto kang Davao City Police Office (DCPO) Director Vicente Danao Jr. aron mahatagan og seguridad ang mga suspek kay duna silay nadawat nga bahad.
Gikan sa pagproseso sa mga papeles padung sa pag-escort sa mga suspek ngadto sa korte, okupado ang kapulisan sa pagbantay sa palibot aron luwas ang mga suspek.
Sumala ni Danao nga di gayud magpakita kaniya ang mga tawong mihulga sa mga suspek kay mamatay gayud sila.
"Kayong mga naghulga, ayaw gyud mo og pakita nako. Sana hindi mag-abot ang landas natin, mamatay gyud mo, timan-i na ninyo," sulti ni Danao.
Samtang padayon ang gihimong imbestigasyon sa kaso, dako ang pagtuo sa kapulisan nga gawasnon pa gihapon sa pagkakaron ang utok sa maong krimen. (Jeepy P. Compio)