GIBALHOG sa selda sa San Pedro Police Station ang usa ka Dutch national human gireklamo sa iyang higala nga babaye kay nang-blackmail kaniya.

Ang suspek mao si Mearsk Ian (bansagon gitago), 24, ulitawo, temporaryong nagpuyo sa Jose P. Laurel Avenue, siyudad sa Davao, ug taga nasud New Zealand.

Si Police Officer (PO) 3 Rizalito Clapiz III, imbestigador sa general investigation section sa presinto dos, nagsulti nga nasikop ang suspek sa ilang gilusad nga entrapment operation alas 4:30 sa kaadlawon kagahapon, Miyerkules, didto sa F. Torres Street.

Giingong naguol ang biktimang si Lyka (bansagon gitago), 19, tinun-an sa usa ka iladong tunghaan ning siyudad ug lumad nga taga Tagum City kay i-upload sa suspek ang ilang giingong hubo nga picture sa Facebook.

Sumala sa mensahe sa suspek ngadto sa babaye nga iyaha kining buhaton kung di magpakita kaniya ang biktima sud sa 24-oras.

Tungod niini, daling nagpatabang ang biktima sa kapulisan sa pag-blackmail kaniya sa maong langyaw hinungdang nga nasikop kini.

Ang mga ginikanan sa biktima nga pulos doktor sa Tagum City pursigidong mopasaka og kaso batok sa suspek.

Sa kasamtangan, temporaryong gibalhog sa selda sa kapulisan ang suspek samtang giandam ang posibleng kaso nga ipasaka kaniya didto sa korte.

Samtang didto sa presinto, nagkaabot ang mga ilahong bayot sa siyudad nga nakarelasyon sa suspek.

Nakurat sila tungod kay usa ra diay ka lalaki ang nakapatik sa ilang kasing-kasing mao nga nagkagubot sila.