HUBO ug walay sapot ang usa ka lalaki human nasapon nga misuway paglugos sa 16 anyos nga dalaga sulod sa lawak niini mga ala 1:00 sa kaadlawon kagahapon.

Ang biktima nga taga San Lazaro, Barangay Lapasan, ning siyudad sa Cagayan de Oro, nisaysay sa Sun.Star Superbalita nga nikalit lang og sulod sa iyang lawak ang suspetsado nga nailang si Robert Baganao, 31, nagpuyo sa susamang dapit.

Matud sa biktima nga mata pa siya niadtong higayona ug nakurat na lang sa pagsulod sa suspetsado nga hubo ug adunay dala nga hait nga butang ug deretso nga nipatong kaniya.

Nisukol ang biktima ug gisipa-sipa ang suspetsado ug misayagit og tabang hinungdan nga daling misaka ang amahan niini ug nasapon ang suspetsado.

Samtang sa iyang bahin, hugot nga gihimakak ni Baganao ang maong alegasyon ug niingon nga hubog siya niadtong higayon human nakig-inom sa iyang higala.

Gibutyag niini nga nagtuo siya nga balay sa iyang higala ang iyang gisudlan, hinungdan nga deretso kining naghubo og nag-brief na lang aron unta matulog na.

Gisaysay usab sa silingan sa biktima nga dili man kining tawhana abusado ug gani sukad wala kini nalambigit sa mga away-away o gubot sa maong lugar apan nagtuo kini nga bag-o nga nahilambigit na kini sa giingong ginadili nga druga.

Desidido ang pamilya sa biktima nga mopasaka og kaso batok sa suspetsado nga detinado karon sa Police Station 3 sa Agora.