GIIMBESTIGAHAN sa kapolisan ang kasong pagpanulis nga nahitabo niadtong Martes sa gabii sa Zone-1, Bulua, ning siyudad sa Cagayan de Oro.

Ang One-Stop shop nga nahimutang sa maong dapit ang gitulis sa duha ka wala maila nga suspetsado kinsa misulod og kalit ug nagpatuong mga kostumer nga maayo pa ang pili pili sa mga baligya.

Gisaysay sa tindero nga mao si Marvin Mancunsay, residente sa susamang dapit, nga wala lamang kaayo niya gitagad ang duha ka mga lalaki tungod kay nagtuo siya nga mga kostumer.

Apan dihang kalit lang nanion og wala matinong kalibre nga armas ang suspetsado ug mideklarar og tulis walay nahimo ang biktima kondili ihatag na lamang ang halin nga mobalor og P5 mil.

Wala pa nakuntento ang suspetsado ug giapil pa og tulis ang ilang loader nga cellphone.

Igo na lamang sa pagpatabang sa kapolisan sa Police Station 7 sa Bulua ang biktima ug niasoy nga human nakuha ang tinguha misibat ang mga suspek sakay sa motorsiklo.

Ang kaso padayon pa nga giimbestigahan sa kapolisan ning panahona aron pag-uli sa mga suspetsado. (SVB)