HUMAN sa koordinasyon ug hiniusang operasyon sa kapolisan, narekober ra ang motorsiklo nga gikarnap niadtong Martes dinha sa Poblacion, lungsod sa Opol, Misamis Oriental.
Ang kolor blue nga XRM Motorcycle gipanag-iyahan ni kanhi kagawad Jerry Habla, residente sa susamang dapit.
Sa inisyal nga imbestigasyon sa Opol Police Station pangulohan ni Police Senior Inspector Edwin Baclao, nasuta nga gikarnap ang motorsiklo samtang giparking kini sa dapit ug dihang namatikdan sa tag-iya gitaho kini nila deretso sa kapolisan hinungdan nga nagukod pa ang suspetsado.
Gani niabot pa ang gukdanay sa Upper Carmen ning siyudad sa Cagayan de Oro, hinungdan nakigkoordinar ang kapolisan sa mga polis usab sa Baungon Police Station sa probinsya sa Bukidnon human giingong didto mipaingon ang suspetsado.
Gihulagway sa mga polis ang suspetsado hinungdan nga didto ra kini sa Bukidnon narekober ang motorsiklo apan pakyas human misibat ang suspetsado ug gibyaan lamang ang motorsiklo sa kasagbutan nga bahin.
Gihimolbolan na usab ang motorsiklo, wala nay tambutso ug uban pang parte sa motorsiklo nga gitouhang gidala na sa suspetsado.
Ang kaso padayon pa nga giimbestigahan sa kapolisan aron pag-ila sa suspetsado. (SVB)