DAKO ang kalambuan sa abilidad sa Sugbuanong si Junemar Fajardo gikan niadtong katapusan niyang pagduwa sa Gilas Pilipinas sa international competition.
Sa iyang pagkahisakop sa Gilas sa miaging tuig, dili pa kaayo gamit si Fajardo apan sa pag-umento sa abilidad niini, nahimo na kining labing sinaligan sa San Miguel Beermen.
Apan giklaro ni Fajardo nga baliwala kaniya nga mahimo lang gihapon siyang usa ka back-up player sa Gilas nga mokampanya sa FIBA World Cup nga ipahigayon sa Spain sugod karong Agusto 30. Ang Gilas mosalmot sab sa Asian Games sa Incheon, South Korea nga sugdan karong Oktubre 14.
“Alam ko naman ang role ko sa Gilas. Support ako dun...Mag-adjust na lang ako dun sa Gilas,” asoy ni Fajardo sa interbyu sa www.spin.ph.
Ang produkto sa University of Cebu (UC) Webmasters maoy kaabag sa naturalized players nga sila Marcus Douthit ug Brooklyn Nets center Andray Blatche sa ilawom nga bahin.
Hinuon gituohang mahatagan og dakong tahas si Fajardo ni coach Chot Reyes human kini nakatali og career-best averages nga 16.7 puntos, 14.1 rebounds, 2.0 blocks ug 1.3 assists sa karon nga season sa Philippine Basketball Association (PBA).
Ang 6’10” nga higante maoy nag-una sa mga kandidato sa inilugay sa MVP awards. (Genevieve T. Fernandez, USJ-R MassCom Intern)