MOSALMOT ang University of the Visayas (UV) Green Lancers ni coach Donbel Belano sa 2014 Mayor Kim Lope Asis Invitational basketball tournament nga ipahigayon karong Hunyo 27-29 sa Lope A. Asis Gym sa Bayugan City, Agusan del Sur.

Makabungog nga P575,000 ang kinatibuk-ang ganti sa torneyo, nga usa sa mga kalihukan sa umaabot nga piyesta sa Bayugan.

Ang kampiyon makadawat og P250,000, makabulsa og P150,000 ang 2nd placer, P100,000 sa 3rd placer samtang P75,000 sa 4th placer.

Ang torneyo, nga adunay tema nga “The Place Where Real Basketball Happens,” salmutan sab sa SG Merchandise, Boracay Rhum, ug Joannie Team ni coach Van Halen Parmis.

Tungod sa naglagiting nga ganting salapi, ang tanang teams nagpalig-on sa ilang puwersa sama na lang sa SG Merchandise nga ningkuha og mga magduduwa sa Philippine Basketball Association (PBA) nga sila si Eliud Poligrates ug Jayford Rodriguez.

Dili sab mabangbang ang puwersa sa Joannie Team nga pangulohan sa mga ex PBA nga sila si Jerkules Tangkay ug Ardy Larong lakip na nila ni Brian Heruela, Reed Juntilla, ug Ferdinand Lusdok.

Nagsuporta sa torneyo mao ang Garvey Dy Brand Associate, Omega Pain Killer, Jimberns Builders & Construction Supply, Madyaw Construction, ug Panalay Tailoring. (ESL)