MIAGI og grabeng kulbahinam nga dinumbolay ang Sugbuanong si Warren Kiamco una niya nabuntog si Frailin Guanipa sa Venezuela, 9-8, kagahapon aron pag-abante sa knockout stage sa WPA World 9-ball Championship sa Doha, Qatar.

Si Kiamco, kinsa lumad nga taga Pasil, Cebu City, usa lang sa mga Pinoy nga nakasulod sa knockout stage nga gikan sa loser’s bracket.

Ang uban mao sila si Ramil Gallego, Francisco Felicilda, ug Lee Van Corteza.

Gimakmak ni Gallego si Michel Bartol sa Croatia, 9-3, gipukan ni Felicilda si Ali Obaidly sa Qatar, 9-6, samtang gilampornas ni Corteza si Omran Salem sa UAE, 9-4.

Ang mga Pinoy nga nakatilaw na sab og pilde ug nanamilit na sa kompetisyon mao sila si Efren “Bata” Reyes, Israel Rota, ug Elvis Calasang.

Ang unang grupo sa mga Pinoy nga nakaabante sa knockout stage mao sila si Dennis “Robocop” Orcollo, Antonio “Gaga” Gabica, Elmer Haya, Carlo Biado, Raymund Faraon, Johann Chua, ug Jeffrey de Luna. (ESL)