SA ILANG plano nga i-trade ang ilang katungod sa No.7 overall pick ug buhian si Steve Nash ug ang $9.7 million nga manug-expire nga kontrata niini, gikataho nga usa ang Los Angeles Lakers nga naglinya aron makabira nila ni LeBron James ug Carmelo Anthony.

Ang duha ka superstars pareho nang nakapadayag sa ilang intensyon ngadto sa ilang tagsatagsa ka team nga mosuway sila sa free agency nga mosugod karong Hulyo 1. Puwede na silang mopirma og bag-ong kontrata sa laing team karong Hulyo 8.

Gawas sa Lakers, ang Cleveland Cavaliers ug Atlanta Hawks pulos adunay plano ug adunay kapabilidad nga makakuha og dekalidad nga mga magduduwa sa free agency.

Depende sa negusasyon, si James puwedeng makabalik sa Miami Heat ug mao sab kang Anthony sa New York Knicks.

Ang Lakers kayang motanyag og $33 million kang James alang sa nahabilin niining duha ka mga kontrata sa Heat ug $16.5 million kang Anthony alang sa usa ka tuig nga nahabilin niining kontrata sa Knicks.

Kon buot hunahunaon, puwedeng mas dako ang madawat nila ni James ug Anthony kon magpabilin sila sa ilang tagsatagsa ka team.

Apan kon magkauban silang duha sa Lakers kaabag si Kobe Byrant, labing seguro usa sila sa labing lig-ong puwersa sa sunod season.

Si Anthony dili seguro magmakuli nga makig-uban nila ni Bryant ug James hilabi na kay wala pa siya nakatilaw og korona. (Reuters/ESL)