UBAY-UBAY nga ex-PBA players ang manuwa karong alas 5:00 sa hapon sa Cebu Coliseum alang sa usa ka exhibition game nga gipasiugdahan sa Technical Education and Skills Development Authority (Tesda)-VII.

Gipangtumbok mao sila si Alvin Patrimonio, Kenneth Duremdes, Bal David, Jerry Codinera, Bobby Jose, Rodney Santos, ug Marlou Aquino.

Ang nangahisgutan ma­kig-uban ni Tesda Director General Joel Villanueva ug pipila ka mga sakop sa local media alang sa pagporma sa Team Trabaho.

Ikaparang sa Team Trabaho mao ang Tesda 7 Specialista graduates nga makig uban sa mga pulitiko nga sila si Cong. Samsam Gullas, Cong. Bebot Abellanosa, ug Glenn Soco ug sa ubang Sugbuanong mga ex-PBA.

Sa dili pa sugdan ang duwa, nga giulohan og “Shoot for your Dream Cebu,” adunay press confe­rence nga ipahigayon karong alas 4:00 sa hapon.

Ang pinasidunggang mga dinapit sa opening program mao sila si Cebu City Mayor Mike Rama ug Governor Hilario Davide III.

Libre alang sa publiko ang kalihukan. (ESL)