GITAMBAGAN sa Philippine Health Insurance Corp. (PhilHealth) ang mga ginikanan nga ipamiyembro ang ilang mga anak nga 21 anyos na, kon wa pa sila makatrabaho o mamiyembro sa PhilHealth.

Ang mga anak nga 21 anyos o kapin na ang edad di na kwalipikado nga ma-dependent sa ginikanan. Kinahanglan nga magpamiyembro na sila sa PhilHealth sa di pa o inig dayon og tungtong sa edad nga 21 anyos aron padayon nga makagamit sa benepisyo.

Hinuon, mihatag ang PhilHealth og eksepsiyon sa mga anak nga dunay disability hinungdan nga di siya makasuporta sa kaugalingon ug mao nga nagsalig sa suporta sa ginikanan. Aron masuta sa PhilHealth kon angay hatagan sa eksepsiyon, kinahanglan mopakita ang ginikanan og medical certificate sa anak (gikuha sud sa miaging unom ka buwan) nga mohulagway ug magpamatuod sa disability.

Kon makatrabaho na usab ang anak, bisan og wa pa kini mag-edad og 21 anyos, di na usab siya kwalipikado nga ma-dependent sa ginikanan.

Gimanduan ang mga employer nga iparehistro sa PhilHealth ang ilang mga empleyado ug abagahon ang katunga sa binuwan niini nga kontribusyon — ang katunga maoy iminos sa binuwan nga suweldo sa empleyado.

Kon maminyo na usab ang anak, bisag wala pa mag-edad og 21 anyos, di na siya mahimong i-dependent sa ginikanan. Kon wa siya makarga isip dependent sa bana o asawa, kinahanglan siya nga magpamiyem­bro sa PhilHealth aron padayon nga makaga­mit sa benepisyo.

Aron mamiyembro, submit lang og PhilHealth Member Registration Form (PMRF) sa labing duol nga PhilHealth office, uban sa kontribusyon alang sa kasamtangan nga kwarter. Ang mga individually paying members sa PhilHealth dunay duha ka klase nga premium — P600 matag kwarter sa mga nag-income binuwan (average) og di molapas sa P25,000. Sa mga taas pag income matag buwan, P900 kada kwarter ang kontribusyon.

Pwede magparehistro sa mga PhilHealth Express sud sa mall — Ayala Center Cebu (Monday-Friday, 10:00 am – 7:00 pm), SM City Cebu (Monday-Sunday, 10:00 am – 8:00 pm), Robinsons-Fuente (Monday-Sunday, 10:00 am – 8:00 pm), J Centre Mall (Tuesday-Saturday, 10:00 am – 7:00 pm) ug Pacific Mall (Monday-Friday, 9:00 am – 6:00 pm).

Duna usab PhilHealth Express sa Negros Oriental ug sa Bohol—Robinsons Place-Dumaguete City (Monday-Sunday, 10:00 am – 8:00 pm) ug Island City Mall-Tagbilaran City (Tuesday-Saturday, 10:00 am – 7:00 pm). (PR)