PADAYON gihapon ang koordinasyon sa National Bureau of Investigation (NBI) sa Central Visayas ug sa counterpart niini sa Davao, subay sa pagpalawom sa nahitabong pagpatay sa Sugbuanong negosyante nga si Richard King.
Kini samtang wa pa matino kung ang mga nasikop nga mga suspek sa Davao mao na ba ang tinuoray nga nihimo sa krimen.
Matod ni Director Max Salvador, duna gihapoy mga impormasyon nga gipasusi ang NBI-Davao kanila dinhi sa Sugbo ilabi na kay wala paman gyud hingpit nga nahatagan ug resolusyon ang kaso. Giklaro ni Salvador nga ang NBI-Davao maoy on-top sa imbestigasyon sa ilang ahensiya, nunot sa request nga gihimo sa pamilya ni King. Dugang ni Atty. Salvador nga gitun-an na karon sa NBI-Davao ang tanang anggulo sa krimen, human usab nidangop kanila ang police official nga si Supt. Leonardo Felonia, kinsa maoy gitudlo sa ubang supsetsado nga utok sa krimen.
Napasakaan na og tukmang kaso ngadto sa piskaliya ang mga suspek pagpatay kang King, lakip na si Col. Felonia. (AZDL)