PULOS taga dakbayan sa Lapu-Lapu ang mga menor de edad nga naluwas gikan sa giingong online child pornography uban sa 50 anyos nga Australian national sa lungsod sa Cordova.

Apan giklaro ni Lapu-Lapu City Mayor Paz Radaza nga ang buhatan sa Department of Social Welfare and Development (DSWD) sa dakbayan maoy nakig-alayon sa Children’s Legal Bureau (CLB) human nga nakadawat og reklamo kabahin sa cyber pornography activity.

Gikompirmar sa opisyal nga ang 15 ka mga bata nga nagpangidaron sa siyam ngadto sa 15 anyos ang naluwas atol sa operasyon niadtong miaging adlaw sa Cordova Home Village, samtang adunay duha ka mga biktima nga nakaipsot.

Nasikop ang Aussie national nga si Peter James Robinson, 50, usa ka chemical engineer nga upat na ka adlaw nga niabot sa Sugbo sa wa pa madakpi.

“Taga-Opon nang mga bataa nga nagpuyo sa usa ka barangay (ngalan sa barangay wala ibutyag). Mga elementary ug high school students na sila,” matod ni Radaza atol sa press conference kagahapon.

Usa ka magtutudlo ug usa sa mga ginikanan sa mga biktima ang miduol sa DSWD Lapu-Lapu nga nagpahibawo nga wa mosulod sa ilang klase ang grupo sa maong mga tinun-an ug adunay nakatug-an nga mikuyog sa usa ka langyaw.

Nakig-alayon ang ahensiya sa CLB alang sa dinaliang operasyon, ilabi nga nasuta nga nag-abang og lawak ang mga gipangita uban ni Robinson.

Base sa imbestigasyon nga hayluon sa suspek ang mga biktima sa paghimo og law-ay nga binuhatan uban sa partisipasyon sa langyaw.

Adunay mokuha og hulagway bugti sa cellphone ug P3,000.

Matod ni Radaza nga wa maaktuhi nga adunay gihimong pornographic act atol sa operasyon sanglit naabtan sa mga operatiba nga nanggawas na sa lawak ang mga bata ug nisunod paggawas ang langyaw.

“Ang nakapait ani, kay ang parents (biktima) directly involved. We will go back to all schools aron pag-educate sa mga ginikanan,” saysay ni Radaza.

Ang mga naluwas nga minor de edad kasamtangan nga anaa sa kustodiya sa DSWD Lapu-Lapu sa ilang safe house samtang kasamtangang nabilanggo sa Cordova Police si Robinson nga gikatakda na untang mopa-uli sa Australia kagahapong adlawa.

Dugang pa ni Radaza nga adunay laing cyber pornography activity ang gidudahan nga nag-operate sa duha ka mga barangay sa Lapu-Lapu.

Nipasalig ang mayor nga pahugtan nila ang pag-regulate niadtong operator sa “Piso Net” internet café nga hulgan og tag-piso nga mao na karoy gikabuangan sa mga batan-on tungod sa kabarato niini.

Samtang mohimo og dugang pakisusi ang Cebu Provincial Police Office sa background ni Robinson.

Si CPPO Director Sr. Supt. Noel Gillamac nagduda nga dii lang kadtong 15 ka mga batan-on ang nabiktima ni Robinson nunot sa iyang gidugayon nga nagpuyo sa nasud.

Si Sr. Insp. Alexander Nuñez, hepe sa Cordova police station, niingon nga usa ka 15-anyos nga babaye ang nireklamo sa social welfare office sa Cordova nga gidala siya sa langyaw sa Manila human iyang nakaila pinaagi sa Facebook.

Gani giingong mahadlok ang dalagita kon makita ang Australiano.

Sa nakuhang kasayuran ni Gillamac nga magbalhin balhin og lugar ang maong langyaw ug magdala gihapon og mga batan-ong babaye sud sa lawak niini. (FVQ/DRT)