KON lecture pa ni, magsugod tingali ko og definition of terms: Unsay “Vispop?” Unsay “Visayan” ug unsay “pop?” Maayo gani dili, kay ang pagpasabot sa kahulugan sa mga pulong dili buluhaton sa musikero. Ang buluhaton sa musikero mao ang pagmugna og musika ug paghimo’g kahigayonan nga ang musika mahitabo.

May magbuot ba kon tawgon ta kini’g “Pop-Corn (Pop for Cebu and Our Regional Neighbors), o “Cebu Popeye (Cebu Pop for Everyone – Young and the Elderly), o “Binignit Pop (Binisaya Gyud Ni Tanan Pop)?” Wala. Kay sulti pang Juliet ngadtong Romeo, “What’s in a name? Bansikol, tulingan, barilis, mao ra nang isdaa.”

Apan makasulti ko ninyo nganong naay Vispop. Adunay Vispop tungod kay tapak kini sa haw-ang nga among nakita sa atong Binisayang musika. Kaniadto, ang mga batan-ong Bisaya walay musika nga matawag nila’g ilaha, kanang matawag nila’g soundtracks of their lives. Gibahin sa duha ka tradisyon ang musika kaniadto: ang kataw-anan ug ang magul-anon. “Sa Unang Pagtan-aw Ko’g Sine” sa pikas, “Matud Nila” sa pikas. Ang genius ni Max Surban didto, ang genius ni Ben Zubiri dinhi.

Adunay haw-ang sa tunga. Ug dinhi niining haw-ang ang mga batan-ong Bisaya naglatagaw.

Mintras tanto sa Manila sa dekada otsenta, ang Apo Hiking Society ug ilang kaubanan sa OPM way puas nga nagbuhat og mga kanta nga gihangop sa mga batan-on didto. Gisundan sila sa Eraserheads ug ilang kaubanan sa Pinoy Rock sa dekada nuybenta.

Ang ilang mga kanta naghisgot og uspag nga maong, ang kalami sa kinawat-kawat nga yakap sa dilim, mga kantang naghisgot og mga babayeng naninda’g suka sa tindahan ni Aling Nena sa eskina. Sinserong lingwahe sa mga batan-on. Langas nga areglo.

Balik sa Cebu, ang mga batan-on wa lang gihapoy ilaha, samtang ang ilang katigulangan busy sa pagpangita sa sunod nga “Matud Nila” ug sunod nga “Usahay” sa mga kinahon nila nga kompetisyon. Ug hinay-hinay, nasud sa ulo sa mga batan-on nga ang Bisayang pinulongan alang kang lolo’g lola lamang. Ug naabot ang Bisrock pag 2003, nga pwerte sab ka badlongon uyamot. Apan bisan pa man sa mga pagsaway nga iyang nadawat, ang Bisrock nagbilin og pipila ka awit nga nagpamatuod nga pwede sab mahimong cool ang Bisaya sa mga batan-on.

Enter Vispop. Kami sa Artist Kooperatiba (Artist Ko) di magpanuko pag-ingon nga dako ang inspirasyon nga gihatag sa Bisrock sa katukoran sa Vispop. Pipila namo nga naglihok sa Vispop karon ning-headbang sab sa Bisrock niadtong panahon.

Ug naa na ta dinhi karon, ikaduhang tuig sa kompetisyon. Kon magmalumposon ba ta o dili, sayo pa ang pagtagna, ug dili sab angayan nga kita ang mohusga.

In the meantime, sit back, relax, and enjoy Vispop.

(Opening Speech, Vispop 2.0 Finals Night, SM Cinema One, June 24, 2014)