NADAKPAN og gani napasakaan naman og kaso sa Davao City Police ang gi-ingon nga mipusil-patay sa magpapatigayon nga si Richard King. Ang triggerman o mamumuno gi-ila nga si Paul Dave Molina Labang. Matod pa aduna siyay accomplice o kauban sa pagkomiter sa maong krimen nga ang managsuong Rodel ug Rommel Dela Cerna, kinsa maoy nagmaniho sa motorsiklo nga maoy ilang gisakyan. Samtang ang usa mao ang nagsilbing lookout.
Si Labang nga nahinabi sa GMA news Davao nga diin nakita usab dinhi sa GMA 7 Cebu Balitang Bisdak ang footage, mi-angkon sa maong salaod. Tinabunan ang iyang nawong og tualya, yano nga gi-angkon ni Labang ang pagpatay kang King. Gani nangayo man kini og pasaylo sa mga kabanay sa biktima. Mitumbok si Labang sa usa ka Police Supt. Leonardo Felonia nga maoy misugo kaniya nga patyon si King gumikan kay kini matod pa usa ka druglord. Si Felonia mao ang hepe sa Regional Intelligence Unit sa Region 11, Southern Mindanao.
Mitahan/motibo
Human migawas ang iyang pangalan, mibutho usab dayon kini so Felonia ug mitahan sa iyang kaugalingon ngadto ni Davao City Mayor Rodrigo Duterte nga mao ang midala niini ngadto sa National Bureau of Investigation (NBI) Region 11. Nahibawo ba mo nga kini si Felonia nadestino labi adto diha sa Mandaue City Police Office niadtong 2008 hangtod sa 2011 diin iyang nahimong hepe si S/Supt. Orlando Ualat? Nabalhin kini sa dakbayan sa Davao niadtong 2011.
Ato lang kunong sakyan kining pag-angkon ni Labang. Dili na lang ta mokuwestiyon sa pagdakop sa mga pulis kaniya o gikulata ba ni siya hinungdan nga mi-angkon. Ibutang nato nga tinuod kini diin iyang gitumbok si Felonia nga maoy nag-hire kaniya. Unsa man kaha pod ang motibo ni Felonia nga iya mang gipapatay si King? Aduna pod kahay nag-hire niya? Gawas lang kon nagka-away sila o adunay atraso si King ngadto kang Felonia.
Anggulo
Daghan kining mga anggulo nga gitutukan karon sa mga imbestigador sa Davao. Una ang business angle o personal grudge ug apil man gani ang love triangle.
Aduna koy nadawat nga mga impormasyon kabahin sa pagpatay ni King. Apan morag dili angayan nakong ipagawas sa publiko kay medyo sensitibo ug walay igong basihanan. Apan gikan kini mismo sa mga suod sa banay’ng King. Ato na lang kining ibilin ug isalig sa mga imbestigador. Apan mao na gyud kaha kini sila ang utok sa pagpatay kang King? Ug mahatagan na kaha og kasulbaran og hustisya ang kamatayon sa maong negosyante?
(bobby. nalzaro@yahoo.com)