GIINTRIGA karon si Jolo Ejercito nga susama og lifestyle ni Jeanne Napoles, ang anak sa gitawag nga pork barrel scam queen nga si Janet Lim-Napoles.
Si Jolo o Joseph Luis Manuel ang ikaduhang anak ni Senador Jinggoy Estrada, kinsa gidetine karon sa Camp Crame tungod sa plunder ug graft.
Matod pa kon dunay Christian Louboutin stiletto si Jeanne, naa sad kunoy Louis Vuitton Montecarlo loafers si Jolo nga nagkantidad og pila ka gatos ka libo ka pisos nga makita sa posts sa anak ni Jinggoy sa iyang Instagram account nga @joloestrada17.
Apan sigon sa Pep.ph nga peke ang maong account ug posibleng usa ra ni ka hater account. Sanglit ang tinuod nga Instagram account ni Jolo mao ang @josephluisman.
Matod pa sa mga Netizen, kon dunay bonggang birthday party ang anak ni Napoles sa Beverly Hills, makita sad sa usa ka post sa fake account ni Jolo ang presidential suite sa Manila Hotel, nga nagkantidad og P100,000 kada gabii.
Ug kon si Jeanne makita nga nagsakay og Porsche limousine, makita sad si Jolo nga nagsakay og private jet kauban ang iyang igsuong si Julian.
Apan si Manila Mayor Joseph “Erap” Estrada todo depensa karon sa iyang mga apo nga kaya mogasto ni Jolo sa mga luhong butang kay duna man kuno ni raket sa showbiz.
Matod usab sa tito ni Jolo nga si Jude Estrada nga libre ang accommodation sa iyang pag-umangkon sa nahisgutang mahalong lawak kay “complimentary.”
Bahin sa private jet, gihimakak ni Erap nga duna sila niini.
“Wala, anong private jet? Kasiraan lang yun. Tingnan niyo, wala namang may eroplano sa amin, wala namang may helicopter. Ako, nanghihiram lang,” dason ni Erap, kinsa masaligon nga maabsuwelto ra si Jinggoy sa giatubang niining kaso.