Dear Noy Kulas,
Tagoa lang ko sa ngan nga Ben, 53. Ambot mag-manoy ba ko nimo kay tan-aw nako maguwang pa ko nimo. Bitaw, manghod man ka nako o maguwang, ang importante imo kong matambagan.
Biyudo na ko sud sa lima ka tuig human mamatay ang akong asawa sa cancer. Taudtaud ko sa abroad ug niuli ko kay nasakit si Misis. Akong giabagan ug giatiman hangtod nga siya namatay. Wa nako siya pasagdi kay ako siyang gimahal. Apan five years na kong way partner.
Nibalik ko diri sa abroad ug naa kay nakaila nga single pa, pero 40 years old na. Nagkauyab ming duha ug gusto niya nga magminyo mi. Nananghid ko sa akong mga anak, apan di sila mosugot. Di sila ganahan nga pulihan nako ang ilang inahan.
Unsa may akong buhaton aning akong sitwasyon karon? Di ba duna koy katungod nga malipay usab? Niingon ang akong mga anak nga di sila moatiman nako kon matiguwang ko kon magminyo ko og usab. Mao ni ang akong nalibgan karon.
BEN
Ben,
Kon imong kalipay ang imong ipatigbabaw, imo kanang desisyon. Sa tinud-anay, wa may makabuot nato kon unsay atong buhaton as long as nga kini makalipay nato basta di lang makalapas sa balaud ug katungod sa uban. Bisan ang imong mga anak di makapugong niini kon mohukom kang magminyo kay wa may balaud sa atoa nga nagdili. Ang lalake mahimong magminyo usa ka adlaw human mamatay ang asawa. Sa babaye, kinahanglan pa nilang maghuwat og usa ka tuig una pa makahimo pagminyo og usab.
Apan sa atong kultura, ang mga anak dunay gahom sa pagpugong. Naa ra sa ginikanan kon ilang paminawon ang ilang anak o mga anak. Naa ra nimo kon imo silang paminawon. Naa ra nimo kon magpahigot ka sa ilang panghadlok kanimo. Natural ra na sa mga anak nga magselos nga dunay lain na nga hinigugma ang ilang ginikanan nga nahabilin. Lainlain usab ang rason sa ilang kahadlok.
Aron mahanaw ni, dad-a ang babaye sa inyong balay aron makaila sila niini. Sa di pa nimo dad-on sa inyoha, sultihi una ang imong uyab sa baruganan sa imong mga anak. Kay nakaila ka sa imong mga anak, sultihi usab siya sa tagsa-tagsa ka batasan nila. Hayan, pinaagi niini, anam-anam nga mausab ang huna-huna sa imong mga anak. Ayaw pagdali-dali sa imong desisyon sa pagminyo. Paminawa una ang duha ka mga habig. Basin duna say makit-an ang imong anak nga apan sa imong uyab. Kita ra bang mahigugma di ka kakita primero sa ngil-ad nga aspeto sa pagkatawo tungod kay na kitay bias daan. Ang ubang mga tawo ang nakakita niini.
Human ning tanan, diha ka na mohukom kon magminyo ka ba pag-usab o di.
NOY KULAS
Alang sa imong problema, e-mail sa kulassuper@sunstar.com.ph ug rojval69@yahoo.com