ANG Sadsad Festival sa Pobla­cion, Oslob usa sa mga labing unang festival sa lalawigan nga namugna niadtong tuig nga sikat nga awit, “Dayang-dayang.” Kini ang nakapaagni kang kanhi Barangay Kapitan nga si Emilito ‘Tata’ Abines paggamit sa maong awit.

Tungod kay nalantawan nga maluma ang Dayang-dayang, nihangyo si Kptn. Tata pagpangitag kompositor nga mohimog jingle. Si Manny Lapingcao akong giduol ug nahimugso ang Sadsad Alang ni San Roque.

Dihang nahimong mayor si Tata, iyang gibalhin ang Sadsad Festival sa Disyembre ug ako na sang gihangyo si Manny paghimog lyrics alang na sa Birhen sa Inmaculada Concepcion.

Salamat ni Kapitan Friedel Ricardo Nazareno ug sa konseho, mabanhaw ang Sadsad Alang ni San Roque karong Agosto. Pito ka mga purok ang magtigi.

Bisan di dagko ang mga ganti, alang sa mga lumu­lupyo mas mahi­nung­danon nga magkahiusa sila aron ma­paalegre ang pista. Viva Senyor San Roque!

***

Weeey! Morag mao nay gitubag sa mga makisine ug mahiligon sa artista sa pag-angkon ni Sarah Geronimo nga uyab gyud sila si Matteo Guidicelli. Maimadyin nako nga gisumpayan pa nig “ngano diay ka?”

Sige bitawg pangulit ang media kon sila na ba, sige limod ang mga kyampaw pero sige pod silang makit-an nga hapit hulmigason na lang sa katam-is.

Karon nga niangkon na sila, mora lag way nahitabo. Mirisi! Abi nilag mailad ang publiko? Weeey!

***

Nagkakusog ang mga bagutbot labot sa pagkatagak ni Nora Aunor sa listahan sa mga bag-ong National Artist.

Naluoy ko sa anak ni Nora nga si Matet de Leon nga naghilak sa tele­bisyon niadtong Lunes nga niingon, “Kung ayaw ninyong bigyan ng award, huwag naman ninyong bastusin” tu­ngod kuno kay di maayo ang moralidad ni Nora.

Tulo ka mga kanhi direktor sa gitawag nga “the one and only superstar of the country,” si Jose Javier Reyes, Joel Lamangan ug Gil Portes, nilaban sa premyadong aktres. Bisan si Robin Padilla nilaban sab.

Miingon kuno si Joey Reyes (atong hubaron): “Abi nako nagpili tag National Artist, dili santa. Hinaut nga way labot ang politika niini kay kon mahitabo, makaabli kinig mga tinaguan ug mga baho.”

Si Joel niingon sab kuno: “Nasag­muyo ko pero wa masurpresa. Di man apil sa criteria ang moralidad. Ang mga nahimo man sa tawo ang basehanan.”

Si Gil giingong nisulti nga: “Unya, kadtong napili na nga National Artist nga di gyud limpyo ang mga kina­buhi, ato to silang ideklarar di angay sa maong dungog?”

Bisan ang di mga Noranian, gii­ngong nasubo ug nasagmuyo sa hita­bo. Unsa kahay gibati karon sa nibabag sa pagdeklarar ni Nora? Nakatulog kaha siya nga naghayang?

***

Bilib ko sa diskarte sa ABS-CBN ug Star Cinema. Tungod kay dunay guma­gawas nga pelikula si Kath­ryn Bernardo ug Da­niel Padilla nga She’s Da­ting A Gangster, gipa­sulod ang duha sa balay ni Kuya sa Pinoy Big Brother All-In.

Tuod man, morag gikigwa ang mga Kath-Niel fans. Seguradong mokita na usab ang pelikula inig pasalida na niini. Mao nay giingon nga sa makamao lang! Anà.