COTABATO CITY -- Patay ang usa ka empleyado sa Bureau of Fisheries and Aquatic Resources (BFAR) sa Autonomous Region in Muslim Mindanao (Armm) human siya gipusil alas 5:20 sa hapon niadtong Miyerkules.

Giila ang biktima nga mao si Yasser Mamadra, 40, minyo ug molupyo sa Urban Poor Subdivision, Barangay Rosary Heights 8.

Gibutyag ni Cotabato City Police Office Director Rolen Balquin nga nahitabo ang pagpamusil samtang sakay ang biktima sa iyang motorsiklo ug pauli na sa iyang bay.

Sumala pa nga pag-abot sa biktima sa Diversion Road, Barangay Rosary Heights 9, dunay miatang kaniya nga duha ka wala mailhing tawo ug gipusil gamit ang kalibre .45 nga pistola.

Patay gilayon si Mamadra sa diha nga nakaangkon og ubay-ubay nga samad pinusilan sa nagkadaiyang bahin sa lawas.

Abtik sab nga misibat ang mga suspetsado sakay sa laing motorsiklo paingon sa usa ka hilit nga dapit sa siyudad.

Base sa paghulagway sa mga sibilyan nga nakakita sa hitabo, nagpangedaron pa lang og 25 hangtud 35 anyos ang suspek, itumon ang pamanit ug payaton ang panglawas.

Gituohan sa kapulisan nga personal nga atraso o selos sa trabaho ang posibleng motibo sa pagpamusil patay sa biktima nga padayon nila karong giimbestigahan. (Edgar Fuerzas)