USA ka tawo ang nasikop sa otoridad nga ang modus operandi mobayad og dakong kantidad sa mga menor de edad bugti sa paglipay kaniya ibabaw sa kama.

Ang suspek nasikop sa mga operatiba sa National Bureau of Investigation (NBI)-Davao sa My Hotel sa dalang San Pedro, siyudad sa Davao, Miyerkules.

Nasikop alas 5:00 sa hapon atol sa entrapment operation mao si Jonathan Cortes.

Ang suspek gisikop human gireklamo ni Aiza (di tinuod nga pangalan), 15.

Si Aiza midangop sa NBI-Davao tungod kay gipangwartahan siya sa suspek kinsa unang mitanyag kaniya og P20-mil bugti ilang pakighilawas.

Ang biktima giubanan sa iyang witness, kinsa nagsulti nga ang suspek sinaligan sa mga pastor sa relihiyusong pundok nga dunay negusyong direct selling sa Buhangin.

Giingon nga gilungkab sa suspek ang opisina sa witness dayon misibat niadtong Hunyo 23, 2014.

Gipakita sa biktima ang mensahe sa suspek pinaagi sa text nga mag-sex sila sa My Hotel.

Ang suspek nanghuwam pa kaniya og P3-mil tungod kay wa siya nakawidru og kuwarta sa bangko niadtong adlawa.

Sa ilang panagsabot, giingnan sa biktima ang suspek nga unya na niya ihatag ang kwarta kon moabot na siya sa hotel.

Pag-abot nila sa hotel, wa gipasaka sa ahente sa NBI ang biktima, apan gipakombinse sa biktima ang suspek nga kuhaon siya sa lobby.

Dihang miduol na ang suspek sa biktima, gidakop dayon siya dayon gidala sa NBI.

Giandam na kagahapon ang kasong paglapas sa Republic Act 7610 kun Child Abuse Law aron ipasaka sa korte. (AD)