MGA imbestigador nga nag-imbestiga sa kamatayon ni Richard Lim King naglambigit sab kang kanhi Police Regional Office (PRO)-Davao Regional Intelligence Unit chief Leonardo Felonia sa pagbanhig-patay kang Laak Mayor Reynaldo Navarro, suma ni Davao City Mayor Rodrigo Duterte.

"Yung isang namatay doon na tinamaan sa ambush ni Navarro, huwag lang magalit si Felonia, pero yung patay doon merong mission order, pirmado niya. That's why ang NPA issued a disclaimer na hindi sila. Nakatutok ngayon kang Felonia kasi yung patay, yung wallet niya meron doon M.O," sulti ni Duterte.

Apan, dali siyang midugang nga ang paghupot og M.O. di nagpasabot nga magdala kini og kadaut sa uban.

"Sabi nila. I don't know how true that is. You better check that with the police. Total ito totoo naman ito and I don't invent stories. What for? There's no need for me to invent stories," sulti ni Duterte.

Si Navarro padung sa Tagum dihang iyang convoy, lakip iyang sakyanan, gibanhigan pag-abot sa Purok 12, Barangay Sigayen sa lungsod sa Asunsion sa Davao del Norte alas 9 sa buntag niadtong Mayo 28, 2014.

Mga bodyguards sa mayor mibalos sa namanhig kanila nga miresulta sa kamatayon sa duha ka mamumuno.

Sa iyang kaso, suma ni Duterte, nag-request usab siya og M.O. sanglit nagdala sab siya og armas alang sa seguridad.

"Hindi naman ako pwedeng maglibot na nakahubad, o walang armas," sulti ni Duterte.

Subay sa PNP Circular Number 2000-016 penetsahan Disyembre 11, 2000 nga giamendahan sa PNP Circular Numbers 2002, 2002-A ug 2004-A, mga sakop sa Philippine National Police (PNP) maoy otorisadong maka-isyu og mission orders/letter order sa tawo nga magdala sa gi-isyu ug lisensiyado nga armas.

Samtang, si Duterte nagdumili na sab paghatag sa iyang pahayag sa kalambigitan ni Felonia sa pagpatay sa negusyanteng si Richard King.

"Again, I am not the proper persons. I am not an investigator," suma sa mayor.

Si Duterte nagpadaplin sa mga tabi nga si Davao City Police Office (DCPO) Vicente Danao Jr. naglambigit kang Felonia sa kaso tungod sa personal ug propesyunal nga isyu.

"Danao cannot invent charges against him. Siguro professional (issues) nila pero that could not be a good reason. Mahirap mag-imbento ng ganung kaso. I'm sure Danao will not do that. I doubt it," sulti ni Duterte.

Ang DCPO nagduso na og kasong murder batok kang Felonia niadtong Miyerkules.

Gitaktak na sab si Felonia sa iyang pwesto. (Arianne Caryl N. Casas)