MAKIGBATOK ang Gilas Pilipinas og all-star team nga pangulohan sa superstars sa National Basketball Association (NBA) nga sila si Blake Griffin sa Los Angeles Clippers ug Paul Pierce sa Brooklyn Nets karong Hulyo 22-23 sa Araneta Coliseum.

Gawas nila ni Pierce ug Griffin, ang ubang mga magduduwa sa NBA nga mokombati’g apil mao sila si Damian Lillard sa Portland Trailblazers ug Toronto Raptors gunner Demar DeRozan.

Ang duwa, nga giulohan og ‘PLDT Last Home Stand,’ nagsilbeng usa sa mga preparasyon sa Gilas alang sa kampanya niini sa FIBA World Cup nga gikatakdang sugdan karong Agusto 30 sa Spain.

Nagsilbe sab kining tipik sa selebrasyon sa adlawng natawhan sa nagsuporta sa Gilas nga si business tycoom Manny V. Pangilinan, kinsa mianunsyo sa duwa pinaagi sa iyang Twitter account nga @iammvp.

“Happy to announce that PLDT HOME will bring in the biggest basketball charity event ever! Blake, Damian, Truth, DeMar in #GilasLastHOMEStand,” tweet ni Pa­ngi­linan.

Sa dili pa sila makigkontra sa grupo ni Griffin, ang Gilas mosalmot una sa Fiba Asia Cup sa Wuhan, China nga molanat og mga usa ka semana.

Nagkanayon si Gilas coach Chot Reyes nga ang ilang pagpakigbatok sa sikat nga mga magduduwa sa NBA makahatag kanila og dugang kadasig alang sa paghamag sa grabe ka lisod nga tahas sa FIBA World Cup.

Kini maoy labing unang higayon nga nakaduwa og balik sa FIBA World Cup ang Pilipinas.

“This is a fitting send-off for Gilas as they defend the Philippine flag at the 2014 FIBA World Cup,” opisyal nga mensahe ni Reyes nga migawas sa www.spin.ph.

“This is our grand comeback to the world stage, so having a special pick-up game with a powerhouse cast of players will definitely rally the spirits of Filipinos and inspire the boys to play harder.”