HUMAN mipadayag si LeBron James nga mosulod siya sa free agency, daghang team ang mihimo karon og kasikas aron makuha ang giilang pinakamaayong player karon sa NBA.
Sa ato pa, mahimo na siyang makabiya sa Miami Heat ug motapon ngadto sa laing team.
Pero wa ni magpasabot nga hingpit na siyang mawala sa Heat tungod kay mahimo pa man sab siyang tanyagan sa Miami.
Apan tungod kay maipit na sa salary cap ang Miami, kuli na kaayo nilang mabitik og balik si James, gawas lang kon dunay positibong kasabutan nga makab-ot nga naglakip nila ni Dywane Wade ug Chris Bosh.
Ning bag-ohay lang gikataho nga ang tulo nagtagbo sa usa ka restaurant ug gihisgutan ang ilang plano. Wa pa hinuon ibutyag kon unsay kalambuan nga ilang nakab-ot.
Ang Cleveland Cavaliers, nga maoy tag-iya sa no. 1 pick sa 2014 NBA Draft nga ipahigayon karong adlawa, interesado usab nga mokuha og balik ni James kinsa lumad gyud nga taga Akron, Ohio.
Ang Cavs maoy unang team ni James nga iyang giduwaan sulod sa pito ka tuig sa wa pa kini mobalhin sa Miami Heat.
Usa sa mga rason kon nganong mibiya si James sa Cavs mao ang kakuwang sa dekalidad nga mga back-ups.
Apan ning sitwasyon karon, daw anaa nay saktong pisa ang Cavs nga ikasuporta ni James ug kon mahibalik na kini sa ilang kampo.
Sa pagkakaron aduna na silay usa sa pinakamaayong pointguard sa lega nga si Kyrie Irving nga gani human mahimong rookie of the year nakadawat na usab og All-Star MVP award.
Dugangan pa unya sa first pick sa NBA Draft karong adlawa diin gitutukan karon ang duha ka mga bigmen nga sila si Jabari Parker, ang forward sa Duke, ug si Andrew Wiggins sa Kansas.
Ang general manager sa Cleveland nga si David Griffin interesado ni Parker nga nag-average og 19.6 points, apan ang tag-iya nga si Dan Gilbert mipadayag sa iyang kagusto sa 6-8 nga Wiggins kinsa nag-average og 17.4 points per game ug 6.0 rebounds.
Iyang gihulagway nga si Wiggins maoy usa sa pinakamaayong wingman sa NBA drafting sukad ni James.
Dunay mga taho nga ning higayona moinsister gyud si Gilbert sa iyang gusto human ang iyang mga sinaligan napalpak sa pagpili sa no. 1 pick sa niaging tuig diin ilang gikuha si Anthony Bennet nga wa gyud makapakita og ayo.
Kon masubay sa subok kining plano sa Cavs, labing siguro sila na unya ang unang team sa NBA nga adunay tulo ka no. 1 picks sa drafting playing at the same time – Lebron James (2003), Kyrie Irving (2011) ug ang ilang no. 1 draft pick karong adlawa. Mao na unya ni ang ilang Big 3.
Sila si James ug Irving nakapruyba na sa ilang kalidad human makaangkon og mga individual awards. (junmigs0622@yahoo.com)