GUMIKAN sa mga kontrobersiya nga naglibot sa Black Pearl Security Agency, si Mayor Johnny delos Reyes sa Talisay City nakahukom nga mopahigayon og laing bidding alang na sa security agency nga kuhaon sa Talisay City Hall.

Ang Black Pearl nahimong kontrobersiyal usab sa Kapitolyo human niserbisyo nga walay igong pagtugot ug walay armas ang pi­pila ka mga guwardiya.

Mao kini hinungdan nga nakahukom si Gov. Hilario Davide III nga mopahigayon og laing bidding pagkuha og laing agency.

Sa Talisay, mas nahimong kontrobersiyal human gasas sa pipila nila ka guwardiya ang

walay armas, nagserbisyo sila sa city hall sukad sa miagig tuig bisan ug niadtong higayona walay license to operate ang security agency.

Usa ka Vicente “Jun” Cabrera nipasaka og kasong graft and corruption ngadto sa Office of the Ombudsman Visayas batok sa mayor ug mga sakop sa Bids and Awards Committee nga gipangulohan ni Yre ug mga kaubanan.

Kini base sa report sa Commission on Audit (COA) labot sa ilang pagkuha sa serbisyo sa Black Pearl Security Agency nga gikuha sa Talisay.

Si Cabrera nitumbok nga ano­maloso nga gawas nga walay bidding, wala pay license to

operate ang agency, wala mananghid sa konseho, ug gihimo nga mga job order busa naalkanse ang siyudad og minil­yon.

Apan, ang mayor ug city admi­nistrator nanalipod sa ilang gihimo ug niingon nga andam silang moatubang sa kaso.

Si Yre una nang nisapabot nga dili pa hingpit o pinal ang nigawas sa COA report human isumiter pa alang sa ilang pagpasabot ug mapapas ang mga kuwestiyon kon tagsatagsa nila makapasabot uban sa suporta nga dokumento.

Samtang, gipahibalo na ni Ma­yor de los Reyes nga karong Lunes mapupos na ang kontrata sa Black Pearl Security Agency tali sa Talisay.

Gusto ang mayor nga mopahigayon og laing bidding alang sa security guards.

Si Yre una nang nipahibawo nga depende kini sa mayor kon iya bang i-renew ang kontrata aron makapdayon sa pagserbisyo sang­lit natagbaw man sila sa performance niini.

Ang mayor nga mopahigayon na lang og laing bidding apan mitataw nga wala usab kini magpugong sa Black Pearl pagsalmot sa bidding ilabi na kay kompleto naman silag mga dokumento.

“Everybody is welcome to join the bidding,” matod ni Yre nga nahinabi sa Sun.star Superbalita.

Midugang si Yre nga posibling ila lang i-extend ug pipila ka buwan ang kontrata sa Black Pearl samtang magpaabot sila kon si kinsa ang modaug nga security agency.