Higanteng estatuwa ni Lapu sa Luneta, ibalhin sa Sugbo

ANG higante nga rebulto ni Datu Lapulapu nga nagbuntaog sa Luneta Park didto sa Manila ang ibalhin sa iyang yutang natawhan sa dakbayan sa Lapu-Lapu.

Nahimong kontrobersiyal ang maong rebulto nga gi-donate sa Korean Freedom League niadtong 2004 human gisupak sa mga Rizalista ang pagbutang ni Lapulapu sa Luneta.

Ang kalihim sa Department of Tourism (DOT) Ramon Jimenez Jr. dakong uyon nga ibalhin ngadto sa Lapu-Lapu City ang 40-footer nga istatuwa human personal nga mihangyo si Mayor Paz Radaza niadtong miaging buwan.

Gipahibawo sa mayor nga ang maong re­bulto ilang ipahimutang unya sa Mangal Point ang kinatumyan sa amihanang bahin sa Lapu-Lapu nga nahimutang sa Barangay Punta Engano.

Tuyo nga mobutang og man-made island sa maong dapit diin ipa­barog si Lapu-Lapu susama sa Statue of Liberty didto sa New York.

Masaligon si Radaza nga sa dili pa matapos ning tuiga kahatagan og katumanan ang maong proyekto nga magsilbing garbo sa mga Oponganon.

Samtang ang Tourism Product Development Consultant sa dakbayan, Balbino “Ka Bino” Guerrero nipasabot nga usa sa hinungdan kon ngano nga dili madawat sa pipila ka mga Manileño ug die-hard Rizalista ang istatuwa ni Lapu-Lapu gawas nga mas taas pa kini sa monumento ni Rizal, ang Luneta Park gitagana lang sa “heroes of the revolution.”

Si Lapu-Lapu kasamtangan nga nagbarog sa Agripino Circle diha sa Luneta Park ug dugay nang gidebatehan nga kini ipatangtang, human nga gidawat ni kanhi DOT Secretary Ri­chard Gordon ang maong esta­tuwa gikan sa Korean Association.

“Walay laing lugar sa tibuok nasud nga angayang kabalhinan sa bantayog ni Lapu-Lapu, kon dili sa iyang yutang natawhan,” pamahayag ni Guerrero sa dihang nahinabi sa Sun.Star Superbalita.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph