NIABOT na og 82 ang gidaghanon sa mga kaso sa tipos sa tulo ka mga barangay sa lungsod sa Borbon, sumala sa usa ka opisyal sa Department of Health sa Central Visayas.

Si Rennan Cimafranca, pangu sa Regional Epidemiology and Surveillance Unit (RESU) 7 sa DOH 7, nagkanayon nga ang maong gidaghanon makonsiderar na nga outbreak sukad nitumaw ang sakit niadtong Martes.

Ang labing daghan natala sa mga barangay Lugo ug Clavera samtang hugot nga gi-monitor ang mga kaso sa Cajel.

“Ma-consider nato nga outbreak. Pero dili na necessary i-declare nato nga outbreak kay if tan-awon nimo sa figures, epidemic proportion siya. Unusual increase ang cases niya,” pagpasabot niini dihang nahinabi sa Sun.Star Superbalita kagaha­pon.

Sa siyam ka mga tawo nga nakuhaan nila og blood samples niadtong Miyerkules, pito niini ang nagpositibo sa sakit base sa gihimo nga typhidot testing.

Si Provincial Health Officer Cynthia Genoso­lango una nang nikompirmar nga nagpositibo sa kagaw ang tinubdan sa tubig sa mga apektadong mga molupyo nga usa ka spring base sa nakuha nga water samples.

Sa 82 ka mga kaso, pito ang ang gipang-admit sa nagkadaiyang mga ospital sa dakbayan sa Sugbo, duha niini ang na-discharge na samtang ang lime ang gipaabot nga ma-discharge na sab.

Ang ubang mga molupyo pulos nagpakonsulta sa rural health unit sa lungsod isip mga outpatient.

Ang labing bata usa ka tulo ka buwan nga masuso samtang usa ka 48 anyos ang labing hamtong nga nataptan sa sakit.

Apil sa mga simtomas ang taas nga hilanat, sakit ang tiyan, kalibanga, ug labad ang ulo.

Siya Cimafranca niingon nga ning panahon sa ting-uwan angay nga atimanon sa mga local government unit ang water system sa ilang dapit.

Siya niawhag sa mga opisyal sa mga LGU nga butangan og de makina nga chlorinator ang tinubdan sa tubig sa ilang dapit aron malikayan ang mga sakit.

“For those LGUs nga wala matagad ang ilang water system, it’s time nga ma-improve nila. Mag-purchase sila og de makina nga chlorinator para malikayan ang sakit nga makuha gikan sa mga hugaw nga tubig,” namahayag si Cimafranca.