NIABOT og 42 ka mga bilanggo sa Cebu Provincial Detention and Rehabilitation Center sa Barangay Kalunasan, siyudad sa Sugbo, ang gipangtipdas, ang Regional Epidemiology and Surveillance Unit sa Department of Health nihimo na og mga pamaagi uban sa tagdumala sa pacilidad aron mapugngan ang pagkatap sa sakit.

Si Rennan Cimafranca, regio­nal epidemiologist sa Department of Health (DOH) 7, nibutyag nga 11 ka mga priso nga nakuhaan og blood samples niadtong Hunyo 16 ang nakompirmar nga gipangtipdas base sa resulta sa laboratory test samtang ang uban giisip nga epidemiologically linked sanglit su­sama ra usab og selda ang ilang gigikanan.

Kagahapon, laing 12 ka mga bilanggo ang gikuhaan og blood sample nga ipadala ngadto sa Research Institute for Tropical Medicine (RITM) sa kaulohan ug ang resula mahibaw-an sa sunod semana.

“Knowing pareho sila og simtomas, pareho sila og selda gikan pwede nato ma-consider nga epidemiologically linked cases,” dason ni Cimafranca sa pakighinabi sa Sun.Star Superbalita kagahapon.

Ilang gituohan nga gikan sa usa ka dalaw ang nagdala sa sakit ug nitakod ngadto sa mga piniriso.

Si Marco Toral, consultant on jail matters sa Kapitolyo, nipaneguro nga nihimo na sila og pamaagi nga mapugngan ang pagkatap sa sakit sa ubang mga priso.

Matod niya 27 ka mga bilanggo nga pulos nagsakit og tipdas ang gi-isolate sa usa ka lugar nga kanhi mess hall sa bilanggoan aron dili makatakod sa ubang mga priso.

Si Cimafranca niingon nga ang nangasakit nga mga priso pulos nagpakita og simtomas sa tipdas sama sa ubo, sip-on, nagpuwa ang mata ug pagpuwapuwa sa panit.

Ang RESU 7 sa DOH 7 nanghatag na og Vitamin E supplement ngadto sa mga priso sa CPDRC.

“Mous-os ang Vitamin E sa imong lawas kung magtipdas ka, maapektuhan ang imong panan-aw para malikayan nanghatag tag og Vitamin E supplement,” pagpasabot ni Cimafranca.

Nasayran nila ang pagtumaw sa sakit human ni-report si Cristina Giango, ang doctor sa clinic sa CPDRC sa ilang buhatan.

Si Toral nagkanayon nga usa ka “trustee” nga priso ang unang nasakit og tipdas hangtod natakdan ang u­­ban nga gipanghilantan ug dunay mga gagmayng libagha sa panit.