DEAR Noy Kulas,
Maayong adlaw. Naaghat ko og padala sa akong suliran kay galibog ko.
Ako si Van, mid 30s. Akong problema mahitungod sa akong duha ka uyab nga puro OFW ug puro buotan. Taglima ka tuig na ni nako silang duha nga wa kahibawo nga duha sila sa akong life. Maayo man ko modalag tago ug schedule sa mga lakaw. Kani sang duha wa ni nako surendere og bandera kay mahadlok ko nga mas maproblema ko.
Kani karon naproblema na gani ko kay gusto na silang makigminyo nako kay gawas nga nagkatiguwang na kuno mi, stable na kaayo sila sa life kon financial ang estoryahan. Igo na kuno ilang natigom para magpakasal ug makapamilya.
Noy, unsaon kaha ni nako pagpili kay nag-expect ra ba ni silang duha nga pakaslan nako sila. Wa sila kahibawo nga pareho silang duha, nag-propose. Unsa man ang akong buhaton? Tambagi ko aron imong magiyahan. Daghang salamat.
VAN
Van,
Bitaw, lisod sab ni ang imong patambagan nako. Few times na ko nakadawat og ingon ani nga letter nga naglibog pud pagpili.
Kon pareho silang duha, usa sa imong ikonsiderar ang background sa ilang tagsa ka pamilya. Giunsa niya pag-treat ang iyang pamilya ug unsay relasyon sa pamilya. Kay sagad gud, produkto ta sa atoang environment sa bata pa or sa atoang formative years. Wa ta giporma sa mga tunghaan, kon di sa atoang balay. Busa maayong obserbahan ang ilang tagsa ka pamilya.
Tan-awa usab ang ilang mga batasan ug how they deal with other people, labina in worst situations. Human ining tanan, pangayog time nga igo aron makahuna-huna ka kinsa nilang duha. Unya, sultihan mo sila sa tinuod nga duha sila sa imong kinabuhi. Sakit man tuod ug mabasol ka ning mao nga problema, ang pag-decide kinsa kanilang duha gikinahanglan nga imong pagahimuon. Makapasakit ka man tuod kay kinsa may di masakitan nga nagpasalig ka nilang duha. But gikinahanglan nga matuldokan kining tanan.
Pag-ampo usab nga giyahan ka sa Ginuo sa imong desisyon.
NOY KULAS
Alang sa imong problema, e-mail sa kulassuper@sunstar.com.ph ug rojval69@yahoo.com