DAKONG insulto ug tamparos ngadto sa mga opisyales sa lungsod sa Cordova kining lain na usab ug bag-ong nahitabo kalabot sa cybersex crime diin usa ka Australian national ang nasikop uban sa 17 ka mga menor-de-edad sa usa ka beach resort sa maong lungsod.

Ang Australian nga si Peter James Robinson nakuhaan og USB ug uban pang kahimanan sa teknolohiya diin nakita sa hulagway ang mga menor-de-edad ug giingong mga ginikanan nga walay sapot.

Dakong insulto tungod kay lab-as pa sa atong panumdoman nga niadtong uwahing semana sa Enero ning tuiga, mahambugon kaayo ang mga opis­yal sa maong lungsod nga mipahibawo nga ang human trafficking pinaagi sa internet ngadto sa ngadto mawala na.

Si Cordova Councilor Angeles Gairanod mitino sa mga tigbalita nga silang mga local government official nakigtambayayong na sa mga government agencies aron pagpuo ning maong krimen.

Matod niya nga ang administrasyon ni Mayor Adelino Sitoy milusad na sa ilang proyekto nga gitawag og Save A Child program nga maoy usa ka solusyon sa pagsugpo niini.

Pero lima pa gani ka buwan gikan sa pagsulti ni Gairanod nakasikop na usab ang kapulisan sa susamang salaod.

Buot ipasabot nga way epekto ang maong programa. Posibli sab nga basin og istorya ray gadako unya wa diay implementasyon?

Pero dili kaha tinuod ang nanggawas sa mga international news nga pipila ka mga barangay officials ang nagprotehir ra usab niini?

Maayo siguro mao ni tinuon ni Mayor Sitoy kon kinsa ning mga barangay officials nga wa moduyog ug mosempatiya sa ilang kawsa.

Kinsay nasayod nga dunay mabudhion sa imong grupo, Mayor.