ORMOC CITY - Imbestigasyon sa nahitabong shootout sa Barangay Tambulilid nga nikalas og usa ka kinabuhi ug niangol og laing unom hingpit nang tak-opan karong buwana.
Kini maoy gipadayag ni P/SInsp. Elvis Angayangay sa Northern Leyte-CIDG nga nagbase sa Ormoc.
Matod ni Angayangay nga duna nalang sila karoy gihuwat nga affidavit gikan sa mga biktima niadtong hitabo.
Kon makompleto na ang mga affidavit ipasaka na dayon sa kapulisan ngadto sa korte ang criminal case sa mga tawo nga nalambigit sa shootout.
Ang CIDG nikompirmar nga may lima ka witness nga nihatag sa ilang affidavit.
Padayon na usab karon nga gidungog ang kasong administratiba batok sa 10 ka mga pulis nga nalambigit sa shootout.
Sa laing balita, wa motakdo ang kadtong usa ka slug nga nakuha sa laing samdan ngadto sa 10 ka armas sa kapulisan nga gigamit sa shootout.
Kahinumduman nga tulo ka biktima nga nakuhaag slug apan bugtong kang Dr. Jay Movilla
lang nga slug ang nihaom sa usa ka pistola sa 10 ka pulis.
Samtang blangko pa gihapon ang kapulisan kon kinsa ang nakapatay sa subject sa buy bust operation nga si Sim Serrano.
Matod ni Angayangay nga wa makuha ang slug gikan kang Serrano kay wa mohatag og permiso ang pamilya niini nga ipaubos sa autopsy ang patayng lawas.
“Kon di siya ma-autopsy, di gyod ta makakuha sa slug,” pasabot ni Angayangay.
Niini, malaumon karon ang pamilya sa nakalas ug mga samdan nga makab-ot nila ang hustisya sa hitabo. (JKDP)