NAPUN.AN og unom ka mga piniriso sa Cebu Provincial Detention and Rehabilitation Center (CPDRC) ang nataptan sa sakit nga tipdas.
Sa unang gikatahon nga 42 nga nataptan niini sulod sa provincial jail, naayo na ang katunga hinungdan nga 21 nalang ang nahibilin.
Apan tungod kay napun-an og 6 kagahapon, 27 na ang kinatibuk-ang ihap niini sa pagkakaron.
Gipang-isolate na sa laing selda ang mga nataptan og tipdas ug wala gipatipon sa mga piniriso nga wa natapti sa sakit.
Si CPDRC consultant Marco Toral niingon nga posibleng usa sa mga dalaw sa miaging semana ang nagdala sa virus, busa nangasakit ang pipila sa piniriso.
Karong weekend, di na nila tugutang modawat ug masakiton nga bisita ang mga piniriso aron paglikay sa mga posibleng sakit.
Nahatagan na hinuon ug medication ang mga inmates nga naigo sa tipdas. Gipasuot sab sila ug surgical mask aron paglikay nga makakatap pa ang kagaw.
Ang usa sa mga inmates nga naigo sa sakit, Timoteo Lucernas, miingon dunay mga pagkaon nga ila unang gilikayan aron di na mograbe pa ang balatian.
Si Lucernas, naayo na hinuon sa sakit, apan makita pa ang mga uwat, agi sa tipdas. (AZDL)