KORONADAL CITY - Patay na nga nakaplagan ang usa ka negusyante human naghikog alas 7:40 sa buntag niadtong Huwebes didto sa probinsiya sa South Cotabato.
Giila ang biktima nga mao si Robert Sinoy, 46, minyo ug molupyo sa Improgo Village, Barangay Poblacion, Banga.
Nasayran gikan sa spot report sa South Cotabato Provincial Police Office nga gitawag sa iyang mga anak ang ilang amahan aron mamahaw.
Apan wala gyud siya migawas sa iyang kuwarto ug wala sab motingog sa ilang pagsampit.
Sa diha nga gipugos sa pag-abri ang pultahan sa iyang kuwarto, dako ang ilang kakurat gumikan patay na siya nga nagbitay gamit ang nylon cord nga gihikot sa iyang liog samtang ang laing tumoy gihikot sa kisame nga bahin.
Nasayran nga sa wala pa mahitabo ang paghikog sa biktima, namatikdan sa pamilya nga naghilom-hilom lang siya ug panagsa lamang moadto sa iyang tindahan.
Nagduda ang kapulisan nga posibleng sobrang kamingaw o kaguol ang hinungdan sa paghikog sa negusyante gumikan kay namatay ang iyang asawa sa sakit nga breast cancer.
Hinuon kapulisan padayon pang nag-imbestiga sa hitabo aron nga maseguro nga way foul play sa iyang kamatayon. (Edgar Fuerzas)