TAGUM CITY - Usa ka 18-anyos, kinsa gisugdan na paglugos sa iyang ama-ama sa nag-edad pa siya og 14-anyos, mipaambit sa pait nga kasinatian isip call girl.
Si Jessica (bansagon gitago sa Superbalita) nagsulti nga una siyang nangandoy nga mahimong doktor aron maalagaran ang mga kabus nga masakiton sa ilang baryo, apan tungod sa iyang kapalaran, mga lalaki nga uhaw sa lawasnong panginahanglan ang iyang naalagaran.
"Bata pa lang ko, pangandoy na nako nga mahimong doktor, apan tungod sa way puangod nako nga ama-ama, kinsa mi-rape nako sa makadaghang higayon niadtong 14-years old pa lang ko, maoy hinungdan nga naundang ko sa pagtungha," sulti ni Jessica.
Giingon ni Jessica nga human siya milayas sa ilang balay, misud siya isip katabang sa adunahang pamilya sa siyudad sa Tagum.
Usa ka adlaw niana samtang nagtrabaho ang biktima, gilugos siya sa iyang agalong lalaki.
"Human ato, ginahatagan na ko niya og 500 pesos matag higayon nga iya kong hilabtan," sulti ni Jessica, kinsa midugang nga gibaharan siyang patyon kon motug-an sa agalon niyang babaye.
"Nahadlok pod ko kay naa man siyay pusil mao nga dihang wala na ko nakaagwanta, milayas ko sa ilang balay," dugang ni Jessica.
Siya nagsulti nga nakaila niya ang ilang kanhi silingan nga si alyas Mariz nga nagtrabaho sa Tagum City isip call girl.
"Siya ang nagtudlo nako kung unsa ang trabaho sa call girl," asoy ni Jessica nga naghilak. "Kulba ang akong gibati sa unang customer nga naghulat nako sulod sa lodge."
Si Jessica nagsulti nga managlahi ang kinaiya sa mga lalaki nga, alang niya, managsama lang og tuyo nga mao ang pagpahimulos sa iyang pagkababaye.
"May pagkasadista ang uban, dili matagbaw kung dili ko mapasakitan. Ang uban hot kaayo kay bisan unsang posisyon ipabuhat sa ako," matud niya.
Ang trabaho sa call girl, suma ni Jessica, di sama sa mga babayeng’ nagtrabaho sa night club sanglit kontakon lang sila kung dunay nakontrata nga kustomer ang ilang mga bugaw.
"Bisan ingon ini ang akong trabaho pero naningkamot ko nga makahuman sa high school. Who knows may milagro nga matuman ang akong damgo nga mahimong doktor," suma ni Jessica nga mipahiyom nga puno sa paglaum.