Balay sa negusyante gilunggkab, mga alahas nabitbit

DUL-AN tunga sa milyon nga mga alahas ang nabitbit sa kawatan human gilungkab ang usa ka balay nga nahimutang sa Block 4 Lot 20, Barangay Consolacion ning siyudad sa Cagayan de Oro niadtong Martes.

Mitaho sa Police Station 5 (PS5) sa Macabalan si Erlin Luz Selaras, 33, dalaga sa susamang lugar human nasuta nga dunay nakasulod sa iyang balay.

Si Selaras usa ka Overseas Filipino Worker (OFW) nanag-iya og usa ka lending firm, sari-sari store ug namaligya usab og mga alahas.

Sa inisyal nga imbestigasyon, nasuta nga ang wala maila nga suspetsado nakasulod pinaagi sa pagguba sa window grills sa maong panimalay.

Nabitbit sa suspetsado o mga suspetsado ang mga butang sama na lamang sa usa ka bracelet barbada chains P200, 000.00, usa ka pendant crus P4,500, usa ka necklace P20,000, usa ka wallet, usa ka ATM Abroad P10,000, usa ka Laptop Acer Brand P51,000, usa ka pares sa earring P24,000, usa ka hard disk, salaping Cash nga dolyar P10,000, usa ka white gold necklace P30,000, white gold pendant P15,000, mobalor kini kapin kon kulang sa P349,500.

Ang kaso giduso na sa Intelligence Operatives alang sa dugang pa nga imbestigasyon ug gawasnon pa ning panahona ang maong suspetsado.