PATAY ang 13 anyos nga batan-on human nabanggaan sa sakyanan niadtong nilabay'ng adlaw mga alas 5:30 sa hapon sa Sayre Highway, Maradugao Road, KM 6 Base Camp Maramag, probinsya sa Bukidnon.

Giila ang biktima nga mao si Hermetanio Canania, 13, taga P-11, Base Camp, susamang lungsod.

Sa inisyal nga imbestigasyon ni Senior Police Officer 4 Honorato R. Sabejon sa Maramag Police Station, nasuta nga ang nakaligis sa biktima usa ka Mitsubishi Elf nga nagdala og plaka nga RKB-720 gipanag-iyahan ni John Lester Tan ug gimaneho ni Noel C. Pequiro sa San Jose, lungsod sa Quezon, Bukidnon.

Nasuta nga paingon sa Maramag ang direksyon sa sakyanan apan samtang nagdagan sa naasoy'ng dapit, kalit lang niining nabanggaan si Cananania nga mitabok niadtong tungora sa kalsada.

Gibutyag sa driver nga wala siya kamatikod sa biktima ug nakuratan siya pag-ayo dihang kalit lang kining mitabok nga daw wala naglingi-lingi.

Ang suspetsadong driver ang detinado na ning panahona sa Maramag Police Station kinsa gikatakdang mag-atubang sa kasong reckless imprudence resulting to homicide.