GIKASOHAN na sa Cebu Provincial Anti-Illegal Fishing Task Force ang duha ka mga tawo nga nasakmitan og endangered shells sa operasyon sa Minglanilla niadtong Miyerkules.
Si Loy Anthony Madrigal, pangu sa Civil Security Unit sa Kapitolyo, nibutyag nga kasong kalapasan sa Section 27 sa Republic Act 9147 o Wildlife Resources Conservation and Protection Act ang ilang gipasaka batok nila ni Ronnel Tumakas, 32, drayber ug Delfin Jacosalem, 45, nga pulos gipangdakop.
Apil sa gipasakaan og kaso mao ang tag-iya sa trak nga si Estanilo Pepito, kinsa gawasnon pa.
Mahimo sila makapiyansa sa kasong giatubang ug girekomendar sa piskaliya ang P40 mil nga piyansa alang sa matag sinumbong subay sa ilang tinguha nga makaangkon og temporaryong kagawasan.
Nagbalor og P2 milyones ang nasakmit nga mga budyong apan kon adto na kini ipamaligya sa gawas sa nasod moabot og gatosan ka milyon ang kantidad niini, matod ni Madrigal.
Sa kinatibuk-an, dul-an sa 30,000 ang gidaghanon sa kinhason nganasakmit.