SA LABING unang higayon, ipahigayon ni Cebu City Mayor Michael Rama mohimo sa iyang State of the City Address (Soca) sa hawanan sa konseho karong Hulyo 2 atol sa weekly session.
Si Rama wala nibutyag kon unsay unod sa iyang Soca apan nipadayag nga “abangan ang susunod na kabanata” nga maoy iyang ikaupat nga pag-asoy sa publiko pinaagi sa konseho ug unsay tinuoray nga kahimtang sa dakbayan.
Sa unang tulo ka tuig sa unang termino ni Rama, ang iyang Soca ipahigayon sa Plaza Sugbo gumikan sa bangi sa pulitika apan karon lahi na ang scenario.
Si Rama nakadawat og imbitasyon ni Bise Mayor Edgardo Labella kinsa maoy presiding officer sa konseho kinsa iya sab kauban sa Team Rama ug laing upat ka mga konsehal.
Niadtong tuig 2010 diin si Rama unang nilingkod, wala makapahigayon si Rama sa iyang Soca sulod sa session hall sanglit iyang kaatbang sa pulitika si kanhi Bise Mayor Joy Augustus Young human niaslom ang ilang pulitikanhong relasyon human nibiya ang mayor sa Bando Osmeña Pundok Kauswagan ni Kanhi Mayor ug Kongresista Tomas Osmeña ug nitukod sa pundok nga Team Rama.
Sila si Osmeña ug Rama nagkaatbang pagkamayor sa dakbayan diin si Rama ang gikonsidera sa kinabag-an nga “underdog” sanglit si Osmeña maoy ilang giila nga lider ug amahan sa BOPK apan, si Rama ang nigawas nga madaugon.
Si Jonathan Tumulak, operation’s head sa City Traffic Operation Management (Citom) ,nipasidaan sa mga motorista nga atol sa maong adlaw (Miyerkules) ang ilang buhatan mohimo og re-routing sa mga sakyanan nga mag-agian sa mga karsada nga nagpalibot sa Cebu City Hall.