TULO sa lima nga napositibo sa ginadiling drugas sa Barangay Carreta mga babaye gikan sa 65 ka mga empleyado atol sa surprise drug test sa Cebu City Office for Substance Abuse Prevention (Cosap).
Si Dr. Alice Utlang, executive director sa Cosap, nagkanayon nga ang tulo ka mga babaye nagtrabaho isip barangay tanod, barangay environment officer (BEO) ug gender and development (GAD) samtang ang duha ka mga lalaki mga barangay tanod.
Si Utlang nibutyag nga daan nang gipasidan-an ni Kapitan Eduardo Lauron nga pahunongon na sa ilang paggamit og shabu kadtong mga empleyado nga gidudahan nga tiggamitan og illegal nga drugas apan nagmagahi.
Gipasabot niya nga ang lima ka mga napositibo hatagan og laing higayon nga makausab sa ilang kaugalingon ug ipaubos sa drug rehabilitation sulod sa tulo ka buwan ilawom sa pagdumala sa iyang buhatan.
Siya wa na mahibong sa mga babaye nga napositibo gumikan sa padayong paghitak sa shabu.
GITANGTANG NA
Sugod kagahapon, wa na pabalika og trabaho ang siyam ka mga kawani sa Cebu City Government human sila napositibo sa shabu atol sa gilusad nga random drug test.
Kini ang gibutyag ni Atty. Dominic Diño, officer in-charge sa Human Resource Development Office human nimando si Mayor Michael Rama sa pagputol sa ilang serbisyo ug di maghuwat nga mohupas ang ilang kontrata.
Samtang way nagpositibo sa paggamit og ginadiling drogas sa kinalit nga drug test nga gipahigayon sa Cebu Provincial Anti Drug Abuse Commission sa Cebu Provincial Detention and Rehabilitation Center kagahapon sa buntag.
Moabot sa 34 gikan sa 70 ka mga kawani ang napaubos sa drug test samtang adunay usa ka jail guard ang wa makaihi.
Apil sa gi-drug test ang mga administrative personnel, jail guard ug tulo ka mga gwardiya, samtang ang dul-an 40 ka mga kawani ang wa maapil sa drug test tungod kay ni-escort sa mga piniriso nga dunay mga hearing sa korte samtang ang uban panggabii ang duty.