KANHI sakop sa US Special Forces namatay kay gipusil sa gidudahang nag-inusarang gun-for-hire nga nagsakay sa motorsiklo niadtong Huwebes sa alas 5:10 sa hapon sa Barangay Balud, Dalaguete, Sugbo.
Ang gunman nakuhaan og footage sa close circuit television (CCTV) camera sa lungsod nga naniid sa kapulisan.
Si Stephen Ray Gornto, 53, nagpailang kanhi sakop sa US Special Forced ug Iraq War veteran, naka-asawa og Pinay, namatay sa 10 ka mga samad pinusilan sa kalawasan.
Wa pa mailhi sa kapulisan ang killer nga nag-helmet ug gihulagway nga taas og buhok, linginog nawong ug kasarangan ang panglawas.
Nagsul-ob kini og sweat shirt nga puti, nag-cargo shorts, nagsakay sa Yamaha Mio nga motorsiklo, kolor puti ang atubangan, yellow-orange sa kilid ug itom ang cover sa lingkuranan.
Si Insp. Rico Emperwa, hepe sa Dalaguete Police Station nga nahinabi sa dySS Super Radyo/Sun.Star Superbalita, nagkanayon nga ang biktima nigawas sa gate sa giabangang balay kay nagpaabot sa contact nga car dealer.
Ang killer nga nagsakay sa motorsiklo kalit nga nibutho ug nibunot sa dalang armas ug gipusil sa makadaghang mga higayon ang biktima.
Kasagaran sa mga igo sa dughan hinungdan nga dead-on-arrival (DOA) sa tambalanan sa Dalaguete ang biktima.
Ang gunman paspas nga nisibat paingon sa lungsud sa Argao ug wa na maabti sa mga pulis.
Ang kapulisan nakakuha og 13 ka empty shell sa wa pa matinong kalibre sa armas ingon man usa ka slug.
Si Emperwa niingon nga gun-for-hire ang killer, kinsa niinom pa og usa ka botelyang beer sa tindahan mga 50 metros gikan sa giabangang balay sa biktima.
Human nakita ang biktimang nigawas sa gate, nagdali sa pagsakay sa motorsiklo ang gunman dayon giduol ang Kano ug gipusil.
Usa ka saksi nga lalaki nakahatag nilag impormasyon nga taas kinig buhok, linginon ang nawong ug kasarangan ang panglawas ug di pa ederan.
Base niini, nihimo sila og cartographic sketch sa gunman.
Ang gunman nakuhaag duha ka footage sa CCTV camera sa atubangan sa munisipyo diin gituohan nila nga naniid una nihimo sa krimen.
Ang unang footage nakuha sa wa pa ang krimen samtang ang ikaduha mao ang pagbiya niini sa crime scene.
Paglabay sa singko minutos, miagi pagbalik sa atubangan sa munisipyo.
Way plate number ang motorsiklo samtang ang CCTV footage ila pang ipa-enhance sanglit di kaayo maklaro.
“Tataw’ng gun-for-hire ni siya. Makita man nato nga gisuhid una niya diri atbang sa may munisipyo, apil ang among buhatan una pa nihimo sa kremin,” dugang ni Emperwa.
Nagtuo silang di taga Dalaguete ang gunman gumikan kay naniid sa biktima ingon man sa
dapit.
Ang biktima mga duha pa lang ka buwan nga naabot diha sa Dalaguete gikan sa kauluhan diin taga didto ang iyang asawa nga si Dhalia Repasa.
Ang biktima dunay gikabanging negosyanting British national niadtong Dominggo nga dunay asawa nga Pinay nga nagpuyo sa Dalaguete, matod ni Emperwa.
“Kini siyang biktima war shock pud ni siya, trouble maker. Makaduha ka higayon nga nakakitag away. Una Pinoy, pero ma-settle lang gumikan sa kahubog,” matod ni Emperwa.
Nagtuo siya nga hayan nahitabo kini tungod sa nahiaguman sa biktima nga trauma sa gubat sa Iraqi.
Nahibaw-an nila nga na-igo kini sa pagpamomba, apan naka-survive.
Siya gitauran og pacemaker.
Nagduda ang kapulisan sa British national kay wa na diha sa ilang pinuy-anan.