SI Elmer D. Haya mao na lay nahabilin nga Pinoy alang sa tinguha nga modaug sa 2014 WPA World 9-Ball Championship title alang sa Pilipinas human matanggal ang laing upat ka mga kauban sa Saad Sports Club sa Doha, Qatar.
Ang 37 anyos ug kanhi Sun.Star Superbalita 9-Ball champion sa Cebu malampuson nga nakalusot padulong sa semifinals.
Si Haya, kinsa OFW nga nagbase sa Abu Dhabi, United Arab Emirates, gipildi ang mga kaubang Pinoy nga sila si Johann Chua (11-7) ug Raymund Faraon (11-8) sa quarter-finals ug Last 16 round sa maong han-ay.
Una na niyang gipildi si Japanese Hijikata Hayato, 11-8, sa Last 32.
Sunod niyang makalaban mao si si Neils Feijen sa The Netherlands, kinsa mipildi sa Pinoy nga si Carlo Biado, 11-7.
Si Feijen anaa sa rank No. 12 sa WPA men's rankings apan si Haya wa pa miabot sa top 396 players sa kalibutan.
Tungod niini, gikonsidera siyang underdog alang sa semifinals.
Ang laing unom ka Pinoy nga midaug og WPA world titles mao sila Efren "Bata" Reyes (8-Ball, 9-Ball), Ronnie Alcano (8-Ball, 9-Ball), Dennis Orcollo (8-Ball), Francisco "Django" Bustamante (9-Ball) ug Rubilen Amit (women's 10-Ball). Si Filipino-Canadian Alex Pagulayan nakasungkit sab sa WPA 9-Bball title niadtong 2004 sa Taipei, Taiwan. (MLSA)