COMPOSTELA VALLEY PROVINCE - Giabagan na sa Provincial Social Welfare Development Office (PSWDO) ang usa ka 13 anyos nga babaye nga mimabdos human giamong-amongan sa kaugalingong amahan.
Ang biktima gitago sa ngalang Jasmin, molupyo sa Barangay Poblacion sa lungsod sa Compostela.
Nasayran sa Superbalita pinaagi kang Police Officer 1 Sherly Adjilin sa Compostela Municipal Police Station nga ang biktima gisugdan sa pagkunsumo sa iyang amahan sukad pa niadtong bulan sa Disyembre 2012.
"Kining victim, sigun sa iyang saysay, sinugdan na pag-among-among sa kaugalingong amahan sukad pa niadtong December 2012. Ug matud pa nga dili na maihap ang higayon sa gihimong pagpanamastamas sa kaugalingong amahan. Ug niadtong bulan sa Abril tuig 2014, nasuta nga nagsabak ang biktima," matud ni Adjilin atol sa gihimong pakighinabi kaniya sa Superbalita.
Ang inahan sa biktima, matud pa, dugay nang nakigbulag sa amahan sa biktima ug atua na nanimuyo sa siyudad sa Davao ug may lain na sab nga pamilya.
Nasayran nga si Jasmin maoy nahibilin sa balay uban sa iyang amahan sanglit ang manghod niini nga babaye maoy gidala sa inahan sa dihang milakaw gikan kanila.
Dugang nasayran nga ang mag-amahan nagpuyo sa balay sa igsuon sa suspek nga wala nasayud sa nahitabo.
Sa pagkakaron, ang biktima anaa na sa kustodiya sa iyang iyaan, inabagan sa tabang sa PSWD samtang gihikay na ang kaso nga ipasaka batok sa amahan kinsa kalit lang nahanaw human nga nasayran nga nagsabak na ang biktima.
Dugang gibutyag ni Adjilin nga ang maong hitabo mao nay ikaupat nga kasong lugos sa lungsod sulod ning tuiga. (Dexter T. Visitacion)