KORONADAL CITY - Miabot ngadto sa 150 ka mga lumad ang nangahilo human maniudto sa gipaluto nga pagkaon alas 5:00 sa hapon niadtong Biyernes didto sa Barangay Tablu, Tampakan, South Cotabato.

Nasayran gikan kang Jimmy Baret, tribal leader sa B'laan community sa Sitio Kolondatal nga sa 150 nga nangahilo, 120 ka tawo ang nadala sa South Cotabato Provincial Hospital (SCPH), kasagaran mga bata ug tigulang.

Sumala ni Dr. Conrado Braña, chief sa SCPH, nga ang gidala nga mga pasyente nakasinati og sobrang sakit sa tiyan, nagsuka-suka ug nangalipong nga daw hubog.

Gikanayon ni Cecile Mancho, accounting clerk sa B'laan Foundation sa Barangay Tablu, nga nagpa-cater sila og 200 pack lunch alang sa gihimong general assembly kabahin sa Banlas project.

Ang mga mitambong mga tribal members gikan sa Sitio Tucayman, Manisi, Batu, Crossing, Lagdik, Magga, Kolon Datal, ug Sitio Center sa Barangay Tablu.

Sumala pa nga nagsugod ang panagtapok alas 8:00 sa buntag ug pag-abot alas 12:00 sa udto nangaon sila. Unya pagkahuman, nanguli na sa ilang matag balay ang mga miyembrong tribal.

Paglabay sa lima ka oras, nagsugod na ang sobrang kasakit sa tiyan sa mga biktima, diin nagsuka-suka na ug nangalipong.

Dali dayon nga gidala ang moabot sa 150 ka tawo sa Tampakan District Hospital apan ang 120 niini nga medyo grabe, gibalhin dayon sa SCPH sa Koronadal City.

Nasayran nga ang mga pack lunch nga dunay sulod nga pritong manok, itlog ug kan-on nga maoy gipaniudto sa mga biktima.

Ang Department of Health, kapulisan ug mga lokal opisyal padayon pa nga nag-imbestiga sa hitabo.