USA ka call center agent ug laing usa ka lalaki ang naghikog sa managlahi nga lugar sa siyudad.

Sumala sa kapulisan, ang pagkagumon sa drugas ug selos ang gituohang hinungdan sa paghunos sa kinabuhi.

Ang unang insidente nadiskubrehan pasado alas 6 sa milabayng gabii sa Barangay Lorega.

Ang nagpakamatay giila nga si Cristopher Reyes, 29, ug way kla­rong trabaho.

Si Ronald, igsuon sa namatay, niingon nga iyang gipangita ang iyang igsuon aron patabangon sa iyang karenderiya sa maong dapit apan wa niya kini igkita, hangtod nga niadto siya sa pansayan ug sa iyang pag-abli, nakit-an ang biktima nga nagbitay sulod sa pansayan.

Matod pa ni Police Officer 1 Reuful Adalim sa Homicide Section nga alambre nga gigamit sa hayhayan ang gigamit sa biktima sa paghikog.

Sa imbestigasyon sa kaipon sa biktima nga selos ang hinungdan sa iyang pagpakamatay human sila kanunay nga mag-away.

Nagduda si Reyes nga ang iyang kaipon nga batan-on may laing gikarelasyon, apan kusganon kini nga gipanghimakak sa iyang kaipon.

Sa laing bahin, nagpakamatay ang usa ka call center agent nga si Raymund Estardo, 25, taga BC Homes, sityo son-ok, Barangay Lahug.

Nadiskubrehan kini nga nagbitay sa ilang kusina ginamit ang electrical wire, pasado alas 9 sa gabii.

Matud sa iyang apohan nga si “Thelma” nga sa ilang pagpauli, mingaw ang iyang panimalay ug sirado ang pultahan gikansa sulod.

Gisangpit si Estardo nga maoy nahabilin sa panimalay, apan wa kini motingog, hangtod nga ila kining gilili sa bintana ug nisunod ang dakong lagubo sa kusina ug didto makita ang biktima.

Gipugos sa pagguba ang pultahan sa kusina ug nakita ang biktima nga nalup-og diha sa sawog.

Dali nila kining gidala sa tambalanan ug gideklarar nga dead-on-arrival.

Si Carmel, asawa, niangkon nga nagumon sa drogas ang iyanbg ba­na, miabut na sa punto nga magpanghadlok na kini makakita ug tawo ug dili na masabot ang sinultihan.

Ang asawa wala atol sa pagka hitabo, human kini mibuwag sa iyang bana pipila ka adlaw ang nakalabay ug niipon sa iyang ginikanan. (JFT)