Lima ka mga dagkong call center companies ang gipaabot nga mobubo og puhunan sa Central Visayas karong tuiga.

Ug dugang 50 mil ka mga trabaho ang posibleng mahatag sa pagsulog sa bag-ong business processes outsourcing (BPOs).

Gibutyag kini atol sa tigom sa Regional Development Council (RDC) 7 sa miaging semana ngadto sa Bohol, diin si Gob. Edgar Chato maoy ni-preside isip bag-ong chairman.

Ang labor sector representantive sa Wage Board 7 nga si Joe Tomongha, kinsa nitambong sa RDC meeting nibutyag nga dinhi sa Sugbo ug sa Dumaguete City sa Negros Oriental tukuron ang nahisgutang BPO companies.

Nipadayag og kalipay si Tomangha sa maong kalambuan, ilabi na kay gipaabot nga makahatag kini og di momenus 50 mil ka mga trabaho alang sa mga lumolupyo sa Central Visayas.

Malaumon si Tomongha nga niining planong sa pagtukod og du­gang BPO companies dinhi sa rehiyon, mahatagan na sab unta og prayoridad sa gobiyerno ang pagpanalipod sa mga nanarbaho sa call center industry.

Dismayado siya sa mga call center nga kalit lang nanira nga wala gani mohatag og abiso sa mga trabahante nga makalitan sa pagpanira sa ilang gittabahoan.

Sagad sa mga trabahante, wala makadawat sa ilang mga suweldo atol sa pagpanira sa pipila ka mga call center.

Alang ni Tomongha, kinahanglan mapanalipdan ang mga anaa sa BPO industry ilabi na kay dako kini ug natampo sa ekonomiya dili lamang sa Sugbo ug sa Rehiyon 7, lakip na sa tibuok nasod. (AZDL)