GIPASALIG ni Bise Mayor Romeo Villarante sa Talisay City nga ang konseho andam mohatag og katungod ni Mayor Johnny delos Reyes (JVR) nga mosulod og kontrata ni bisan kinsang security agency nga modaug sa ipahigayong bidding sa Bids and Awards Committee (BAC).
Karong Lunes, mapupos na ang kontrata sa Blackpearl Security Agency nga nagserbisyo sa Talisay City Hall.
Gumikan sa kontrobersiya nga naglibot karon sa maong security agency, inay i-renew ang kontrata si JVR nakahukom nga mopahigayon og laing bidding alang na sa security agency nga ilang kuhaon.
Usa ka Vicente “Jun” Cabrera ang nipasakag kasong graft and corruption ngadto sa Ombudsman batok sa mayor ug mga sakop sa Bids and Awards Committee nga gipangulohan ni Yre ug mga kaubanan bahin sa giingong kontrobersyal nga kontrata tali sa Black Pearl.
Hinuon, si JVR ug anak niini nga si Yre miingon nga andam silang moatubang sa kaso.
Si Villarante nga nahinabi sa Sun.Star Superbalita niingon nga dili na sila mohatag og pagtugot sa mayor sa iyang gisudlang kontrata sa miaging Marso tungod kay aduna nay kaso ug gikuwestyon na kini sa Commission on Audit (COA).
“Dili na kay questionable man ang Blackpearl right from the beginning sa ilang trabaho,”matod ni Villarante.
Gihangop ni Villarante ang plano sa mayor nga mohimo nag laing bidding ug nipasalig nga moabag sa mayor. (DRT)