USA ka Cebuana nga nagbase sa Australia ang nakuryentihan patay gumikan sa gigamit nga depektuso nga Universal Serial Bus (USB) phone charger.
Si Sheryl Anne Aldeguer ang napalgan nga patay na samtang nagsul-ob og headphones sud sa iyang panimalay sa East Gosford, New South Wales sa Australia.
Adunay nakita nga mga paso sa iyang mga dunggan ug dughan gumikan sa high voltage nga nidagan sa iyang lawas gikan sa depektuso nga charger, matod sa Fair Trading NSW.
Ang inahan sa duha ka mga anak ang napalgan nga patay na sa iyang mga higala niadtong Abril 23.
Ang phone charger nga nagbalor og $4.95 ang gituohan nga maoy nakaingon nga ang high-voltage electrical pulse niadto sa iyang phone, nga nibalhin sa earphones nga iyang gikonektar ngadto sa laptop.
Ang 28-anyos nga ginang motrabaho unta isip theatre nurse sa Gosford Hospital kon wala pa mamatay.
Sud na sa unom ka buwan nagpuyo siya sa Melbourne diin siya nagbansay sa iyang pagkanars aron makapasar sa standards sa Australia.
Si Lynelle Collins sa Fair Trading NSW niasoy nga si Aldeguer adunay gihinabi sa iyang phone nga gi-plug ngadto sa wall socket niadtong higayona.
“The voltage seems to travel up through the faulty charger into her phone and she was wearing earplugs and also operating a laptop which was also plugged into a power point,” saysay ni Collins.
“So the (electricity) travelled back down through the earphones to the laptop and into the power point,” dason niya.
“Two-hundred-and-forty volts (then) travelled up into the phone which obviously the phone isn’t designed to handle. Bodies are very good conductors of electricity so it’s travelled through her body,” dugang pa niya.
Si Fair Trading Commissioner Rod Stowe nagkanayon ang mga tag-iya sa Campsie, ang mobile phone company sa charger, mag-atubang og multa hangtod sa $875,000 ug two-year custodial sentence.
“We will certainly be further investigating an outlet which we have detected have supplied these types of non-complaint articles (chargers) with a view to prosecution,” dugang niya.
Ang maong patigayon ang gitak-opan na ug gatosan ka mga depektuso ug non-compliant USB chargers ang gipangsakmit.
Ang mga higala sa namatay nitug-an sa mga pulis nga sila nagtuo ang charger gipalit sa biktima gikan sa mobile accessory outlet sa Sydney, hinungdan nga gironda usab sa Fair Trading officers ang maong patigayon sa niaging semana.
“All the products have been removed. We went out there as soon as possible when we were notified,” saysay ni Collins.
Si Stowe nidugang nga ubay-ubay ka USB-style chargers, travel adaptors ug power boards nga wa makapasar sa safety standards sa Australia ang gipangsakmit gikan sa sale sa usa ka mobile phone accessory stall.
Gikataho nga ang awtoridad wa masayod sa daghang presensiya sa baratuhon ug depektuso nga chargers. (SCG)