BIKTIMA sa kusog nga linog sa probinsya sa Bohol ang usa sa mga nasulod sa top ten sa gipahigayon nga Nursing Licensure Examination (NLE) niadtong Mayo 25 ug 26 niining tuiga.

Si Karen Celeteria, gradwado sa Cebu Normal University sa dakbayan sa Sugbo niadtong Abril, ang nahimotang sa ikanapu nga dapit uban sa iyang 83.80 percent rating.

Sa gipagawas nga resulta sa Professional Regulation Commission, unom ka mga gradwado sa mga tunghaan sa Sugbo ang naapil sa top ten sa board exam nga gipahigayon sa pipila ka mga dapit sa nasod.

Ang PRC niingon nga gikan sa 29,188, niabot og 11,225 ang nakapasar sa licensure examination.

Kini naglangkob nila ni Bernard Vonn Kyle Icamen sa CNU, top three uban sa iyang 85.20 percent rating; Allyson Gaile Saplad sa Velez College, top eight, 84.20 percent; Hazel Marie Echavez sa Cebu Doctors’ University ug Mark James Melendres sa University of San Jose Recoletos, pulos nakakuha og 84.00 percent rating; Celeteria ug Claire Princess Quiñones pulos gradwado sa CNU ug pulos nahimotang sa top ten uban sa ilang 83.80 percent rating.

Si Celeteria niasoy nga naguba ang ilang balay labi na ang kusina nga bahin gumikan sa pagtay-og sa 7.2 magnitude nga linog niadtong Oktubre 15 sa niaging tuig.

“Hangtod karon wala pa mi kabangon kay giuna man ang akong pag-eskwela,” saysay niini sa Sun.Star Superbalita.

Ang iyang amahan usa ka kanhi seaman samtang ang iyang inahan maoy principal sa Cantuba Elementary School sa lungsod sa Buenavista, Bohol.

Ang 20 anyos nga topnotcher taga lungsod sa Buenavista apan kasamtangan nga nagpuyo uban sa iyang mga kabanay sa Barangay Hipodromo, siyudad sa Sugbo.

Siya ang kamaguwangan ug bugtong babaye sa upat ka magsuon uban sa iyang mga manghod nga nagpangedaron og 15, 9 ug 3.

Si Celeteria usa ka umaabot nga call center agent diin nagplano siya magtigom aron suportaan ang iyang pagtungha og masteral.

Siya nangandoy nga makatrabaho sa usa ka dakong ospital o sa Department of Health ubos sa nurse deployment program.

Siya usa ka deboto ni Señor Sto. Niño ug uban sa pag-ampo sa nagkadaiyang mga simbahan sa Sugbo ug kakugi sa pagtuon sa wala pa ang board exam, nilampos siya sa iyang tinguha nga makapasar sa nursing exam ug mahimong top ten.

Ang iyang inahan maoy nag-impluwensiya niya nga mahimong usa ka nurse sanglit aduna usab silay mga kaliwat nga nurse nga atua na manarbaho sa abroad.

Si Karen wa magdahom nga masulod sa top ten apan nag-goal siya nga mahimong top three human sila gidasig sa Powerhouse Review Center, diin sila nag-review.

“Dili magpadala sa pressure. Naay sad kay time sa self although ma­ningkamot ka sa pagtuon but dapat naa kay time for yourself para ma-relieve ka sa pressure from time to time,” siya nipaambit.

Siya mahilig sa Korean pop o Kpop diin ang iyang giidolo ang grupo nga Exo. (SCG)