AMAHAN igo rang nahigmata og makadiyot, apan namatay ra tungod sa kadaghan sa mga samad human dunggaba og kutsilyo sa iyang anak nga nabuang kagahapon sa alas 5:20 sa kaadlawon sa Sitio Bacay, Barangay Tulay, Minglanilla, Sugbo.

Si Saturnino Labiste, 59, minyo, panday, sa daghang mga samad dinungaban sa nagkada-iyang parte sa kalawasan tungod sa pagdunggab ni Reyden, 20, ulitawo, kaniya.

Si Reyden, napusilan sab sa iyang tiil sa mga niresponding police human siya nangatake dihang dakpon human nag-wild og maayo, nanggukod sa mga silingan.

Si Senior Police Officer 1 Renato Masangkay, imbestigador sa Minglanila Police Station nga nahinabi sa dySS Super Radyo ug Sun.Star Superbalita nagkanayon nga nangatulog ang tibuok pamilya dihang nabulabog sa singgit sa amahan.

Giyak-an sa suspek ang iyang amahan ug giduslak sa makadaghang mga higayon.

Nakasukol pa unta kini apan dihang nataruyan sa tiyan, diretsong nawad-an sa ginhawa.

Ang biktima gidala sa Minglanilla District Hospital apan gideklarar nga dead on arrival (DOA).

Si Reyden nanghagit og patay sa mga silingan, naghukas diha sa gawas nga nagtakin sa kutsilyo ug kutob sa gikasugat, iyang dunggabon.

Si Masangkay niingon nga mirespondi sila uban kang Police Officer 2 George Campomanes, PO1 Ronelo Salas, ug mga barangay official.

“Pag-abot namo isog kaayo siya. Buot og patay, naghukas, nagtiniil lang unya siga kaayog mata. Akong giingnan nga ibutang ang kutsilyo ug motahan nga malinawon. Wala mopatuo,” dugang ni Masangkay.

Giataki niya si Campomanes ug bout niyang dungabon dihang natumba ang pulis hinungdan nga si Salas daling mipusil kaniya sa tiil.

Wa mopatuo bisan samdan hinungdan nga ilang gitabangan paglayog.(GPL)